एका दिवसापूर्वी विकत घेतलेली लाडकी म्हैस पडली 12 फूट खोल गटारात अन्...

मुंबई : मुंबईतील घाटकोपर येथे एक म्हैस १० ते १२ फूट खोल गटारात पडल्याची घटना घडली होती. त्यानंतर अग्निशमन दलाच्या जवानांनी तब्बल पाच तास प्रयत्न करत या म्हशीला सुरक्षितपणे बाहेर काढण्याच यश आलं आहे. विशेष म्हणजे एका दिवसापूर्वी विकत घेतलेली म्हैस गटारात पडल्यामुळे मालकाचा जीव टांगणीला लागला होता. पण म्हैस सुरक्षितपणे बाहेर काढल्यानंतर सर्वांनी सुटकेचा नि:श्वास सोडला आहे.

घाटकोपर येथील एका मॅनहॉल मध्ये मध्यरात्री १ वाजेच्या सुमारास एक भलीमोठी म्हैस घाटकोपर अंधेरी लिंक रोड आणि एलबीएस मार्ग जंक्शन एक येथील उघड्या गटारात पडली. मालकाने एकच दिवस आधी विकत घेतलेली म्हैस 10 ते 12 फूट खोल गटारात पडल्यानंतर त्यांचा जीव टांगणीला लागला होता. ही म्हैस गटारात पुढे पुढे जाण्याचा प्रयत्न करत होती. मात्र त्यानंतर ती गटारात अडकून पडली. त्यानंतर स्थानिकांनी याची माहिती अग्निशमन दलाला दिली. अग्निशमन दलाच्या जवानांनी तब्बल पाच तास म्हशीला बाहेर काढण्यासाठी प्रयत्न केले होते.

गटार तोडले तर म्हशीला इजा होईल म्हणून अग्निशमन दलाचे काही जवान गटारात उतरले. त्यांनी म्हशीला मोठी रस्सी बांधून पंधरा ते वीस जवानांनी अक्षरशः हाताने खेचून ही भली मोठी म्हैस बाहेर ओढली. त्यानंतर जेसीबीने तिला वर खेचण्यात आले. सुमारे पाच तास चाललेले हे बचाव कार्य पहाटे सहा वाजता संपले आणि सुरक्षित म्हैस बाहेर आल्यानंतर सर्वांनी सुटकेचा नि:श्वास टाकला.