Mumbai News: इन्स्टाग्रामवर पाकच्या स्वातंत्र्यदिनाचं ठेवलं स्टेटस, दोन विद्यार्थ्यांना मुंबईत अटक!

Mumbai News:  पाकिस्तानच्या स्वातंत्र्यदिनाच्या सोहळ्याचे फोटो इंस्टाग्रामवर स्टेटस म्हणून पोस्ट केल्याप्रकरणी मुंबई पोलिसांनी कुलाब्यातून दोन १९ वर्षीय महाविद्यालयीन विद्यार्थ्यांना अटक केली. मुंबईतील कुलाबा पोलिसांनी ही कारवाई केली. या प्रकरणी एका व्यावसायीकाने तक्रार केली होती.

मात्र, नंतर ताकीद देऊन दोघांनाही सोडून देण्यात आले. मुंबई पोलिसांनी दिलेल्या माहितीनुसार, कुलाब्यातील एका व्यावसायिकाने सोमवारी पोलिसांशी संपर्क साधला आणि तक्रार दाखल केली की, परिसरातील काही मुले पाकिस्तानच्या स्वातंत्र्यदिनाच्या उत्सवाचा इन्स्टाग्रामवर स्टेटस म्हणून वापर करत आहेत. यामुळे जातीय तेढ निर्माण होऊ शकते असे त्या व्यक्तीने सांगितले.

तक्रारीच्या आधारे, कुलाबा पोलिसांच्या दहशतवाद विरोधी पथकाने (एटीएस) सोमवारी रात्री उशिरा या मुलांचा शोध घेतला आणि त्यांना पोलिस ठाण्यात आणले आणि सीआरपीसी 151(3) अंतर्गत त्यांना ताब्यात घेतले, असे एका वरिष्ठ अधिकाऱ्याने सांगितले.

यादरम्यान, पोलिसांनी त्यांचे मोबाईल तपासले आणि दोघांनीही इंस्टाग्रामवर त्यांच्या स्टोरी स्टेटस म्हणून पाकिस्तानच्या स्वातंत्र्यदिनाच्या चित्राचा वापर केल्याचे आढळले. पोलिसांनी त्याच्या मोबाईलचा स्क्रीनशॉट घेतला आणि तो जप्त केला. (latest marathi news)

अधिकाऱ्याने सांगितले की, त्यांच्या वागण्यावरून, बोलण्याच्या पद्धतीवरून असे दिसते की ते १५ ऑगस्टला देशातील कायदा आणि सुव्यवस्था बिघडवण्याच्या उद्देशाने हे करत होते.