मुंबईत भेसळयुक्त दूध विक्रेत्यांवर पोलिसांची कारवाई; ६ आरोपी अटकेत

मुंबई - मुंबई शहरामध्ये विविध नामांकित कंपनीच्या दुधामध्ये अशुध्द पाणी मिसळून भेसळयुक्त दूध विकणाऱ्यांवर मुंबई पोलिसांच्या आर्थिक गुन्हे शाखेने छापेमारी केली आहे. पोलिसांनी केलेल्या कारवाईत एकूण १०१० लिटर भेसळयुक्त दूध जप्त करत ६ आरोपी अटक करण्यात आली आहे.

मुंबई शहरात चालू असलेल्या बेकायदेशीर व अवैद्य धंदयावर बेधडक कारवाई करण्याचे अभियान मुंबई पोलीस करत आहेत. त्या अनुषंगाने पोलिसांच्या आर्थिक गुन्हे शाखेने मुंबईतील शाहूनगर येथील झोपडपट्टीतील काही घरांमध्ये गोकुळ, अमुल, या नामांकित कंपनीचे दुधात अशुध्द पाणी भरून नागरीकांना विक्री करीत आहेत अशी गोपनीय माहिती प्राप्त झाली होती. प्राप्त माहिती मिळताच, आर्थिक गुन्हे विभाग, मुंबई या विभागाने एकूण ०६ वेगवेगळी पोलीस पथके तयार करून सदर घरांमध्ये छापा कारवाई केली.

सदरच्या घरांत दुधाच्या भरलेल्या पिशव्या व अस्वच्छ वापरलेल्या रिकाम्या पिशव्या तसेच भेसळयुक्त दुधाने भरलेल्या प्लॅस्टीकच्या बादल्या, पेटत्या मेणबत्त्या, प्लॅस्टिकच्या पिशव्या, प्लॅस्टीकचे नरसाळे इ. साहीत्य मिळून आले त्यापैकी काही पिशव्या हातात घेवुन त्याची पाहणी केली असता, त्या पिशवीचे कोपऱ्यावर असलेल्या सीलच्या ठिकाणी कापलेल्या दिसुन आल्या. त्यात अशुद्ध पाणी भरून दूधात भेसळ करीत असल्याचे दिसुन आले. सदर कारवाई दरम्यान घरांमध्ये गोकुल, अमुल या नामांकित कंपनीचे रू. ६०,६००/- किंमतीचे एकूण १०१० लिटर भेसळयुक्त दूध मिळून आले. अन्न व औषध प्रशासनाच्या अधिकाऱ्यांकडुन पंचनाम्याअंतर्गत परिक्षणासाठी नमुने घेण्यात आले. सदर छापा कारवाईमध्ये एकूण ६ आरोपीतांना अटक करण्यात आली असून पुढील तपास मुंबई पोलीस करीत आहेत.