प्रवीण दरेकर मजूर नाहीत; सहकार विभागाने ठरवलं अपात्र

मुंबई - मुंबै बँकेची निवडणूक नुकतीच पार पडली. यामध्ये प्रवीण दरेकर यांनी मजूर प्रवर्गातून अर्ज भरला होता. यावर आक्षेप घेत तक्रार दाखल करण्यात आली होती. सहकार विभागाने या तक्रारीची दखल घेत चौकशीनंतर प्रवीण दरेकर हे मजूर नसल्याचं सांगत त्यांना अपात्र ठरवलं आहे. मजूर म्हणून प्रवीण दरेकर हे सदस्यत्वाला अपात्र असल्याचं सहकार विभागाने स्पष्ट केलं आहे.

विधान परिषदेचे विरोधी पक्ष नेते प्रवीण दरेकर यांना सहकार विभागाने तुम्ही मजूर आहात का अशी विचारणा करणारी नोटीस पाठवली होती. यावर आता सहकार विभागाने चौकशी करून दरेकर मजूर नसल्याचे अहवाल दिला आहे.

सहकार विभागाने प्रविण दरेकर यांना अपात्र ठरवताना अनेक बाबींकडे लक्ष वेधलं आहे. मजूर म्हणजे अंगमेहनतीचे आणि शारिरीक श्रमाचे काम करणारी व्यक्ती, तसंच त्याचं उपजिविकेचं मुख्य साधन हे मजुरीच असेल. मात्र दरेकर यांनी विधान परिषदेच्या निवडणुकीवेळी दिलेल्या प्रतिज्ञापत्रात त्यांनी उत्पन्नाचे साधन म्हणून स्वतंत्र व्यवसाय असं नमूद केलं आहे.

दरेकर यांची मालमत्तासुद्धा २ कोटी ९ लाख रुपेय इतकी असून, त्यांच्या नावावर ९० लाख रुपयांची संपत्ती असल्याचंही विधान परिषदेवेळी दिलेल्या प्रतिज्ञापत्रात म्हटलं आहे. शिवाय विधान परिषदेचे सदस्य म्हणून अंदाजे अडीच लाख रुपये मासिक उत्पन्न प्राप्त होत असल्याचंही दिसत असल्यानं तुम्हाला मजूर म्हणता येणार नाही असंही सहकार विभागाने त्यांच्या आदेशात स्पष्ट केलं आहे.

दरम्यान, मजूर म्हणून म्हणून दरेकर अपात्र ठरले तरी त्यांचा मुंबै बँक निवडणुकीच्या निकालावर फारसा परिणाम पडणार नाही. दरेकर हे दुसऱ्या प्रवर्गातून मुबै बँक निवडणुकीत बिनविरोध निवडून आले आहेत. शिवाय मुंबै बँकेवरही त्यांच्याच पॅनेलने वर्चस्व राखलं आहे.