Raigad Ganeshotsav : बसस्‍थानकात परतीची झुंबड

अलिबाग - एसटी बस, कोकण रेल्वेचे बुकिंग हाऊसफुल झाल्याने रायगड जिल्ह्यातील चाकरमान्यांचा मजल-दरमजल करीत परतीचा प्रवास सुरू झाला आहे. गणेशोत्सवाच्या पार्श्वभूमीवर एसटी महामंडळाकडून सुमारे ४५० एसटी बस मागवण्यात आल्या होत्या, बहुतांश बसचे बुकिंग फुल झाल्याने प्रवाशांनी मुंबई, ठाणे, पालघर, सुरत या भागात परत जाण्यासाठी मिळेल त्या वाहनाचा आधार घ्यावा लागत आहे.

सर्वाधिक गैरसोय महाड, माणगाव, श्रीवर्धन, रोहा या तालुक्यातील प्रवाशांची होते. कोकण रेल्वेचे रोहा, माणगाव, महाड असे काही मोजकेच थांबे आहेत. या थांब्यावर लांब पल्ल्याच्या रेल्वे थांबतच नाहीत. काही गणपती विशेष रेल्वेगाड्या सोडण्यात आल्या आहेत. त्यांचेही बुकिंग फुल झाल्याने प्रवाशांचे हाल होत आहे.

राज्य परिवहन महामंडळाने प्रवाशांची गैरसोय लक्षात घेऊन ४५० बस तळा, श्रीवर्धन, माणगाव, पोलादपूर, महाड, रोहा आगारांत पाठवल्या होत्या. या बस रविवार आणि सोमवार अशा दोन दिवस चालणार आहेत. त्यांचीही बुकिंग फुल झाले आहे. शनिवारी (ता. २३) गौरीसह पाच दिवसांच्या गणेशमूर्तीचे विसर्जन झाल्यानंतर बहुतांशी चाकरमानी परतीच्या प्रवासाला लागले.

अलिबाग, पेण, पाली या तालुक्यातून एसटीला गणेशोत्सवात फारसा प्रतिसाद नव्हता; मात्र, दक्षिण रायगडमधून परतीच्या प्रवासासाठी एसटीची सर्वाधिक मागणी होती, त्या मागणीनुसार दोन दिवसांसाठी ४५० बस पुरवण्यात आल्या आहेत. या सर्व बसचे आगाऊ बुकिंग झाले आहे. गणेशभक्तांचा परतीचा प्रवास सुखकारक व्हावा, यासाठी प्रयत्न सुरू आहेत.

दीपक गोडे, विभागीय वाहतूक नियंत्रक, रामवाडी

गावाकडे आल्यानंतर परतीचा प्रवास कोणत्या दिवशी करायचा, हे नक्की नव्हते. श्रीवर्धन येथून रविवारी रात्री निघण्यासाठी एक खासगी गाडी बुक केली होती; परंतु ती गाडी सोमवारपर्यंत येणार नाही, सोमवारी सकाळी कामावर कोणत्याही परिस्थितीत जायचे आहे. यामुळे एसटीने माणगाव येथे जाण्याचा निर्णय घेतलाय. तेथून मुंबईच्या दिशेने जाणारे जे वाहन मिळेल, त्यातून दोन मुले आणि आम्ही नवरा-बायको जाणार आहोत.

संतोष मांडवकर, श्रीवर्धन