Ravindra Chavan: डावखरेंना निवडून आणण्यासाठी काय आहे महायुतीचा प्लॅन? वाचा काय म्हणाले रवींद्र चव्हाण

Dombivli: कोकण पदवीधर मतदार संघाच्या निवडणुकीची मतदान प्रक्रिया सकाळी सात वाजता सुरू झाली. यंदा कोकण पदवीधर मतदारसंघात महायुतीकडून भाजपचे निरंजन डावखरे , महाविकास आघाडी कडून काँग्रेसचे रमेश किर निवडणुकीच्या रिंगणात आहेत.

डोंबिवली मधील साऊथ इंडियन शाळेत कोकण पदवीधर मतदानास सकाळी सुरवात झाली. सकाळ पासून मतदारांनी मतदान केंद्रावर जमण्यास सुरवात केली.

राज्याचे सार्वजनीक बांधकाम मंत्री तथा डोंबिवलीचे आमदार रवींद्र चव्हाण हे देखील सपत्नी डोंबिवलीतील मतदान केंद्रावर दाखल झाले.

मंत्री चव्हाण यांच्या पत्नी सुहासिनी चव्हाण यांनी मतदान करत मतदानाचा हक्क बजावला . यावेळी मंत्री रवींद्र चव्हाण यांनी कोकण पदवीधर मतदारसंघ हा वर्षानुवर्ष महायुतीचा बालेकिल्ला राहिला आहे. या मतदारसंघात यंदा देखील महायुतीचाच उमेदवार निवडून येईल असा विश्वास बोलून दाखवला.

या निवडणूकीसाठी कल्याण डोंबिवलीमधील चार विधानसभा मतदारसंघात एकूण 27 बुथ असून 18 हजार 783 मतदार आहेत. कल्याण पश्चिम विधानसभा मतदारसंघात बिर्ला कॉलेज येथे 15 बूथ असून एकूण 9 हजार सातशे 44 मतदार आहेत.

कल्याण  ग्रामीण मतदार संघामध्ये सिस्टर निवेदिता शाळेत 5 बूथ असून एकूण 3611 मतदार आहेत. तर कल्याण पूर्व विधानसभा मतदारसंघात नूतन विद्यामंदिर येथे 4 बूथ असून 2 हजार 965 मतदार आहेत. डोंबिवली विधानसभा मतदारसंघांमध्ये साऊथ इंडियन शाळेत 3 बूथ असून एकूण 2 हजार 463 मतदार आहेत.