पर्यटन सुरळीत होईल तेव्हाच पालघरमधील हॉटेल व्यावसायिकांना दिलासा!

विरार : कोरोनाच्या प्रादुर्भावामुळे पुकारलेला लॉकडाऊन, त्यामुळे गेल्या सहा महिन्यांपासून बंद असणारी हॉटेल आणि रिसॉर्ट उद्यापासून (सोमवार) सुरू होणार आहेत. त्यामुळे आर्थिक गणित बिघडलेल्या व्यावसायिकांना दिलासा मिळणार असला तरी पालघर जिल्ह्यातील हॉटेल आणि रिसॉर्ट मालकांना पर्यटकांची प्रतीक्षा करावी लागणार आहे.

क्लिक करा : रायगड जिल्ह्यातील पर्यटनाला मिळणार नवी उभारी

सरकारने पर्यटन आणि तीर्थस्थळांबाबत अद्यापही निर्णय घेतलेला नाही.पालघर जिल्ह्यातील पर्यटन-तीर्थस्थळे सुरू केल्यानंतरच हॉटेल-रेस्टॉरंटमध्ये ग्राहक वाढतील. त्यामुळे सरकारपर्यटनस्थळांबाबत कधी निर्णय घेणार, याकडे पालघरमधील हॉटेल-रेस्टॉरंट चालकांचे लक्ष लागले आहे.
 
पालघर जिल्ह्याची पश्‍चिम किनारपट्टी ही ‘मिनी गोवा’ म्हणून ओळखली जाते. स्वच्छ किनारे, प्रसिद्ध किल्ले, निसर्गरम्य वातावरण, पावसाळ्यात वाहणारे धबधबे आणि तीर्थस्थळे पर्यटकांना आकर्षित करतात; परंतु कोरोना महामारीमुळे पर्यटनावर आधारित हॉटेल, रिसॉर्ट आणि त्यावर आधारित इतर व्यवसाय गेल्या सहा महिन्यांपासून ठप्प होते.

क्लिक करा : कशासाठी पोटासाठी! डहाणू, तलासरीतील आदिवासी महिलांची महामार्गांवर भाजीविक्री

राज्य सरकारने सोमवारपासून हॉटेल आणि रिसॉर्ट सुरू करण्यास परवानगी दिली असली तरी जोपर्यंत येथील प्रसिद्ध देवस्थाने आणि किनारे पूर्ण क्षमतेने सुरू होत नाहीत, तोपर्यंत हॉटेल आणि रिसॉर्टमध्ये ग्राहकच येणार नसल्याचे व्यावसायिक सांगतात.  

कोरोनामुळे गेले सहा महिने हॉटेल आणि रिसॉर्टचालकांचे मोठे नुकसान झाले आहे. सरकारने हे व्यवसाय सुरू करण्यास परवानगी दिली तरी आम्हाला तारेवरची कसरत करावी लागणार आहे. पर्यटनाला परवानगी दिल्यानंतरच आमचा आर्थिक गाडा रुळावर येईल. 
- धीरज निजाई, हॉटेल व्यवसायिक, शीतल समुद्र

हॉटेल सुरू करण्यास सरकारने परवानगी दिली असली तरी जोपर्यंत पर्यटन स्थळे, देवस्थाने सुरू होत नाहीत, तो पर्यंत हॉटेल व्यवसायाला चांगले दिवस येणार नाहीत. काहीही असले तरी यापुढे हॉटेल मालक आणि पर्यटक, नागरिक यांना आपली काळजी स्वतःच घ्यावी लागणार आहे. 
- अवी कुसे, हॉटेल समाधान, वसई

-------------------
(संपादन : प्रणीत पवार)