Dadar Railway Station : दादर स्थानकाला चैत्यभूमी नाव देण्याची आठवले गटाची मागणी

मुंबई : रिपब्लिकन पार्टी ऑफ इंडिया आठवले मुंबई प्रदेश युवक अध्यक्ष व उत्तर मुंबई जिल्हा अध्यक्ष रमेश गायकवाड यांनी मंगळवारी दादर रेल्वे स्टेशन येथे जाहीर आंदोलन केले. केंद्रीय मंत्री रामदास आठवले साहेब यांनी बरेच वर्षापासून दादर रेल्वे स्टेशनचे चैत्यभूमी रेल्वे स्टेशन असे नामकरण होण्यासाठी वेळोवेळी प्रशासनाशी पत्रव्यवहार करून मागणी केलेली आहे.

मात्र अद्याप मागणी पूर्ण होत नसल्याने मंगळवारी पुन्हा आरपीआयचे पदाधिकारी रमेश गायकवाड यांच्या नेतृत्वाखाली दादर रेल्वे स्टेशन परिसरात आंदोलन करण्यात आले. या आंदोलनात दहिसर तालुकाध्यक्ष दिलीप आवळे व शेकडो कार्यकर्ते सामील झाले होते. यादरम्यान दादर रेल्वे स्टेशनला चैत्यभूमी रेल्वे स्थानक नाव दिलेच पाहिजे या घोषणांनी दादर परिसर दणाणून सोडले.