वाझे-परमबीर सिंग यांच्यात बंद खोलीत तासभर चर्चा, पोलिसांची भूमिका काय?

मुंबई: अँटिलिया स्फोटक प्रकरण आणि मन्सुख हिरेन हत्या (Mansukh hiren murder) प्रकरणातील मुख्य आरोपी सचिन वाझे (Sachin waze) आणि परमबीर सिंग यांच्यात आज बंद दाराआड तब्बल तासभर चर्चा झाल्याची माहिती आहे. माजी पोलीस आयुक्त परमबीर सिंग (parambir singh) अखेर चांदीवाल आयोगासमोर (chandiwal commission) हजर झाले. सुनावणीनंतर बंदखोलीत ही चर्चा झाल्याची सूत्रांची माहिती आहे.

सचिन वाझे मुंबई पोलिसांच्या ताब्यात आहे. तो एक आरोपी आहे. असं असतानाही दोघांमध्ये तासभर चर्चा कशी होऊ शकते? या प्रकाराने मुंबई पोलिसांबद्दल प्रश्नचिन्ह निर्माण झालं आहे. आता मुंबई पोलीस परमबीर सिंग आणि सचिन वाझे यांच्या बैठकीची चर्चा करणार असल्याची माहिती आहे. बंद खोलीत चर्चा झाली, त्यावेळी वाझे आणि परमबीर यांच्यासोबत त्यांचे वकिलही तिथे हजर होते.

अनिल देशमुख यांच्या वकिलांनी वाझे आणि सिंह यांची भेट आणि चर्चेवर आक्षेप घेतला. त्यावर चांदीवाल आयोगाने "ही भेट कोर्टाबाहेर झालीय , त्यामुळे आपण त्यावर काही करू शकत नाही" असं म्हटलंय. सचिन वाझे प्रकरणामुळेच परमबीर सिंग यांना मुंबई पोलीस आयुक्तपदावरुन हटवलं. त्यानंतर परमबीर सिंग यांनी मुख्यमंत्र्यांना पत्र लिहून माजी गृहमंत्री अनिल देशमुखांनी वाझेला १०० कोटी वसुलीचे टार्गेट दिल्याचा आरोप केला आहे.