Navi Mumbai : सीवूड सेक्टर-44 मधील बांधकाम व्यवसायिकाच्या हत्या प्रकरणात त्याच्याच कार्यालयातील कर्मचारी अटकेत

नवी मुंबई : सीवूड सेक्टर-44 मधील मनोजकुमार सिंग (39) या बांधकाम व्यवसायीकाची हत्या त्याच्याच कार्यालयात काम करणाऱया कर्मचाऱयाने केल्याचे उघडकीस आले आहे. राजु उर्फ शमशुद्दीन आझम खान अबु कुरेरा (22) असे या कर्मचाऱयाचे नाव असून एनआरआय पोलिसांनी त्याला रविवारी अटक केली आहे.

शुक्रवारी मध्यरात्री 12 वाजण्याच्या सुमारास राजुने मनोजकुमार सिंग याच्या डोक्यात लोखंडी रॉड मारुन त्याची हत्या केल्याचे निष्पन्न झाले आहे. मात्र त्याने हि हत्या कशामुळे केली? हे अद्याप स्पष्ट न झाल्याने पोलिसांकडुन त्याची कसुन चौकशी करण्यात येत आहे.

या घटनेतील मृत मनोजकुमार सिंग हा उलवे भागात राहण्यास होता. तसेच सीवूड सेक्टर-44 भागात त्याचे अमन डेव्हलपर्स नावाचे कार्यालय होते. शनिवारी सकाळी 11 वाजण्याच्या त्याच्या कार्यालयात काम करणाऱया दोन मुली कामावर आल्यानंतर मनोजकुमार सिंग हा रक्ताच्या थारोळयात पडल्याचे निदर्शनास आले होते.

या घटनेची माहिती मिळाल्यानंतर एनआरआय पोलिसांनी घटनास्थळी धाव घेऊन त्याचा मृतदेह ताब्यात घेतला होता. मनोजकुमार सिंग याच्या शवविच्छेदनात त्याच्या डोक्यात जड वस्तु मारुन त्याची हत्या करण्यात आल्याचे निष्पन्न झाल्यानंतर एनआरआय पोलिसांनी अज्ञात मारेकऱया विरोधात हत्येचा गुन्हा दाखल करुन त्याचा शोध सुरु केला होता.

मृत मनोजकुमार सिंग याने आपल्या कार्यालयाच्या दरवाजातच मेटेल डिटेक्टर लावले होते. तसेच त्याच्या कार्यालयाचा दरवाजा आतल्याबाजुने उघडले जात होते. त्यामुळे बाहेरचा कुणी व्यक्ती आतमध्ये घुसून त्याची हत्या करणे अशक्य होते.

त्यामुळे मनोजकुमार सिंग याची हत्या त्याच्याच ओळखीतल्या व जवळच्या व्यक्तीने केल्याचा संशय बळावल्याने एनआरआय पोलिसांनी मनोजकुमार सिंग याच्या जवळचे मित्र व कार्यालयात काम करणाऱया सर्वांचीच चौकशी सुरु केली.

मनोजकुमार सिंग याच्या कार्यालयात काम करणारा कर्मचारी राजु उर्फ शमशुद्दीन आझम खान हा कायम मनोजकुमार याच्यासोबत राहत होता. त्यामुळे पोलिसांनी संशयावरुन त्याची चौकशी केल्यानंतर त्याच्या बोलण्यात तफावत असल्याचे आढळुन आले.

त्यामुळे पोलिसांनी त्याची कसुन चौकशी केल्यानंतर त्यानेच मध्यरात्री 12 वाजण्याच्या सुमारास मनोजकुमार सिंग याच्या डोक्यात लोखंडी रॉड मारुन त्याची हत्या केल्याचे निष्पन्न झाले. त्यानंतर त्याला अटक करण्यात आल्याची माहिती पोलीस सुत्रांनी दिली. सदरची हत्या त्याने का केली, हे अद्याप स्पष्ट न झाल्याने त्याची अधिक चौकशी सुरु असल्याचेही पोलीस सुत्राने सांगितले.

या घटनेतील मृत बांधकाम व्यवसायीक मनोजकुमार सिंग याने फ्लॅट विकत देण्याच्या बहाण्याने अनेक लोकांची लाखो रुपयांची फसवणूक केल्याचे उघडकीस आले आहे. याबाबत मनोजकुमार सिंग याच्या विरोधात एनआरआय पोलीस ठाण्यात फसवणुक व अपहार केल्याप्रकरणी 5 गुन्हे दाखल असल्याचे पोलिसांना तपासात आढळुन आले आहे. तसेच एका गुह्यात तो जेलमध्ये सुद्धा जाऊन आल्याचे तपासात आढळुन आले आहे.