चायनीज पदार्थातून सात जणांना विषबाधा

उरण : चायनीज (Chinese) फ्राईड राईस खाल्ल्याने उरण (Uran) येथील सात जणांना विषबाधा झाल्याची घटना बुधवारी घडली. याप्रकरणी मोरा पोलिस ठाण्यात (Thane) चायनीज पदार्थविक्रेता दीपक रमेश थळी (Ramesh Thali) आणि कामगार अर्जुन सत्येंद्रनाथ घोष यांच्याविरोधात गुन्हा दाखल करण्यात आला आहे. पोलिसांनी (Police) दिलेल्या माहितीनुसार, नातवंडे आजोळी मामाच्या गावाला केगाव येथे आली होती.

त्यांनी आजोबांकडे चायनीज खाण्याचा हट्ट केला. त्यानुसार आजोबांनी बुधवारी रात्री उरणच्या एनआय हायस्कूलजवळील एका चायनीजच्या दुकानातून नातवंडांसाठी फ्राईड राईस आणले. फ्राईड राईस खाल्ल्यानंतर मुलांना उलटी आणि जुलाबाचा त्रास होऊ लागल्याने त्यांना तातडीने उरण येथील इंदिरा ग्रामीण रुग्णालयात दाखल करण्यात आले. सध्या या मुलांची प्रकृती स्थिर आहे.सुजल सुजित पाटील (वय ७), रिता सत्येंद्र ठाकूर (वय ३८), सिद्धार्थ सत्येंद्र ठाकूर (वय ११), अर्णव भरत पाटील (वय ९), सिया नीलकमल थळी (वय ९), सानिया सुनील म्हात्रे (वय १५) आणि आर्या सुनील म्हात्रे (वय ४) अशी विषबाधा झालेल्यांची नावे असून मोरा पोलिस अधिक तपास करत आहे.