Sharad pawar Vs Ajit pawar : अजित पवार गटाला शह देण्यासाठी मुंबईत शरद पवार घेणार बैठक!

Sharad pawar Vs Ajit pawar : राष्ट्रवादी काँग्रेस पक्षामध्ये दोन गट पडले असताना आता शरद पवार पुन्हा एकदा आक्रमक झाल्याचे पाहायला मिळत आहेत. त्यांनी यशवंतराव चव्हाण प्रतिष्ठान येथे महत्वपूर्ण बैठक बोलवली आहे. या बैठकीमध्ये बंडखोरी करणारे नऊ मंत्री वगळता सर्वच आमदारांना उपस्थित राहायला सांगितले आहे.

नुकतीच राष्ट्रवादी काँग्रेस पक्षामध्ये फूट पडली. त्यानंतर अजित पवार आणि शरद पवार असे दोन गट राष्ट्रवादी काँग्रेस पक्षात पहायला मिळाले. दोन्हीही गट एकमेकांवर टीका करताना दिसत नसले तरी आपापल्या गटाची ताकद वाढवण्यासाठी दोघेही गट आपल्या परीने प्रयत्न करत आहेत. अशातच आज शरद पवार यांनी एक महत्त्वाची बैठक बोलावली आहे.

नुकताच शरद पवार यांनी राष्ट्रीय निवडणूक आयोगाकडे आपला खुलासा सादर केला होता. यानंतर त्यांनी ही बैठक बोलावली आहे. या खुलाश्यामध्ये शरद पवार म्हणाले होते की, मंत्र्यांनी महत्वाकांक्षापोटी पक्षविरोधी भूमिका घेतली आहे. त्यानंतर आजच लगेच पवारांनी ही बैठक बोलावली आहे.

मात्र दुसरीकडे पवारांच्या बैठकीला जावे की नाही असा प्रश्न राष्ट्रवादी काँग्रेसच्या आमदार खासदारांना पडला आहे. खास करून अजित पवार समर्थक आमदार-खासदारांना हा प्रश्न पडला आहे. आज अजित पवार यांची कोल्हापूर मध्ये सभा आहे. तर मुंबईमध्ये शरद पवार हे बैठक घेत आहेत. अशावेळी या बैठकीला किती आमदार उपस्थित राहतात. यावरच कोणाकडे किती ताकद आहे हे समजेल. असे म्हटले जात आहे. असे वृत्त 'साम'ने प्रसारीत केले आहे.