Shivaji Nalavade: मुंबई शिक्षक मतदारसंघासाठी NCPकडून उमेदवारी जाहीर; शिवाजीराव नलावडेंच्या नावावर शिक्कामोर्तब

मुंबई : मुंबई शिक्षक मतदारसंघासाठी शिवाजीराव नलावडे यांना अजित पवार यांच्या राष्ट्रवादी काँग्रेसकडून उमेदवारी जाहीर झाली आहे. यापूर्वी ठाकरेंच्या सेनेकडून मुंबई शिक्षक ज. मो. अभ्यंकर आणि पदवीधरसाठी अनिल परब यांना उमेदवारी जाहीर केली होती. (Shivaji Nalavade NCP Announces Candidate for Mumbai Teachers Constituency)

मुंबई, नाशिक येथील दोन शिक्षक आणि कोकण, मुंबई पदवीधर मतदारसंघातील दोन अशा एकूण चार मतदारसंघांतील निवडणुकांचा कार्यक्रम निवडणूक आयोगानं २४ मे रोजी जाहीर केला होता. या चार मतदारसंघांसाठी २६ जूनला मतदान होणार आहे, तर १ जुलै रोजी मतमोजणी होईल. निवडणूक आयोगाच्या या नव्या कार्यक्रमामुळं राज्यात पुन्हा एकदा आचारसंहिता लागू होणार असून त्यामुळं अनेक निर्णय रखडण्याची शक्यता तज्ज्ञांकडून व्यक्त केली जात आहे.

याआधी पदवीधर आणि शिक्षक मतदारसंघाची निवडणूक १० जून रोजी होणार होती; मात्र, राज्य शिक्षक सेनेसह अनेक शिक्षक संघटनांनी शाळा, महाविद्यालयांची उन्हाळी सुट्टी लक्षात घेता ही निवडणूक पुढे ढकलण्याची मागणी निवडणूक आयोगाकडे केल्यानंतर ती पुढे ढकलली होती. मुंबई पदवीधर आणि शिक्षक मतदारसंघासाठी भाजप आणि त्याविरोधात महाविकास आघाडीच्या शिवसेना आणि काँग्रेसकडून जोरदार तयारी सुरू आहे.

'या' सदस्यांचा कार्यकाळ संपला

विलास पोतनीस (मुंबई पदवीधर मतदारसंघ), निरंजन डावखरे (कोकण पदवीधर मतदारसंघ), किशोर दराडे (नाशिक शिक्षक मतदारसंघ) आणि कपिल पाटील (मुंबई शिक्षक मतदारसंघ) या सदस्यांचा कार्यकाळ ७ जुलैला संपणार आहे. त्यामुळे निवडणूक आयोगाने २ शिक्षक मतदारसंघ आणि २ पदवीधर मतदारसंघांकरिता निवडणूक कार्यक्रम जाहीर केला आहे.

निवडणूक कार्यक्रम असा असेल

निवडणूक अधिसूचना जाहीर - ३१ मे

उमेदवारी अर्ज दाखल करणे - ७ जून

उमेदवारांच्या अर्जांची छाननी - १० जून

उमेदवारी अर्ज मागे घेणे - १२ जून

प्रत्यक्ष मतदान - २६ जून (सकाळी ८ ते दुपारी ४)

मतमोजणी - १ जुलै

(निवडणुकीची प्रक्रिया ५ जुलैला पूर्ण होईल, असे निवडणूक आयोगाने स्पष्ट केले आहे.)