Kalyan: कल्याणमध्ये धक्कादायक घटना, भरधाव जीपच्या धडकेत दोन तरुणी गंभीर जखमी

Kahdakpada Police : कल्याणमध्ये भरधाव वेगाने येणाऱ्या जीपने एका दुचाकीला जोरदार धडक दिल्याची घटना घडली आहे. या अपघातात दुचाकीवरील दोन तरुणी या गंभीर जखमी झाल्या आहेत. सेजल भानुशाली व समीक्षा भानुशाली अशी जखमी तरुणींची नावे असून दोघी ही इंजिनिअरींगच्या विद्यार्थीनी आहेत.

या अपघातानंतर जीपचालक हे फरार झाले आहेत. याप्रकरणी खडकपाडा पोलिस ठाण्यात गुन्हा दाखल करण्यात आला असून थार जीपचालकाचा पोलिस शोध घेत आहेत.

कल्याण पश्चिमेतील रिंग रोड येथील गांधारी पुलाजवळील एका भरधाव जीप चालकाने दुचाकीला जोरदार धडक देत दुचाकीवरील तरुणींना जखमी केल्याची घटना मंगळवारी सायंकाळी घडली आहे. या दोघींवर रुग्णालयात उपचार सुरु आहेत. दोन्ही तरुणी इंजिनीअरिंगचे शिक्षण घेत आहेत. दुचाकीवरुन घरी परतताना दोघींचा अपघात झाला आहे.

खडकपाडा पोलिसांनी जीप चालकाचा शोध सुरु केला आहे. या जीपवर देवा ग्रुप लिहिले असल्याची माहिती हाती आली आहे. त्यादृष्टीने पोलिसांनी तपास सुरु केला आहे. रिंग रोडचे काम काही ठिकाणी अर्धवट अवस्थेत आहेत.

त्यात काही स्टंटबाज धूम स्टाईल वाहनचालकांमुळे या रिंग रोडवर अपघातांचे प्रमाण वाढले आहे. याला पोलिसांनी वेळीच आवर घालण्याची मागणी येथील रहिवासी करत आहेत.