नात्याला कलंक! वडिलांनीच पोटच्या मुलीवर केला बलात्कार

मुंबई: मुंबईच्या ओशिवरा (oshiwara) आणि सहार (sahar) पोलिस ठाणे परिसरात बाप आणि पोरीच्या नात्याला काळीमा फासणारी घटना उघडकीस आली आहे. या दोन्ही घटनांमध्ये आरोपी बापानेच आपल्या मुलीवर अत्याचार केल्याचे समोर आले आहे. यातील ओशिवरा परिसरात राहणारी मुलगी अल्पवयीन आहे. या दोन्ही प्रकरणात पोलिसांनी आरोपीला बेड्या ठोकल्या आहेत. (Shocking step father rapes daughter In mumbai oshiwara & sahar area)

ओशिवरा परिसरात राहणारी १६ वर्षाच्या मुलीचे आरोपी हे सावत्र वडिल आहेत. मागील अनेक दिवसांपासून आरोपी हा अल्पवयीन मुलीला धमकावून तिच्यावर अतिप्रसंग करत होता. रोजच्या त्रासाला कंटाळून अखेर अल्पवयीन मुलीने पोलिसात धाव घेत आपल्या सावत्र बापाविरोधातच तक्रार नोंदवली. पीडित मुलीचा सावत्र बाप हा रिक्षा चालक असून गुन्हा नोंद होताच, पोलिसांनी त्याला अटक केली.

सहारा येथील घटना

तर सहार येथील घटनेत २० वर्षीय मुलगी शिक्षण घेते. पीडित मुलीवर मे २०१९ पासून ते आतापर्यंत तिचा बापच घरात कुणी नसताना किंवा घरातील व्यक्ती झोपल्यानंतर जिवे मारण्याची धमकी देऊन अत्यचार करायचा. नराधम वडिलाच्या या रोजच्या त्रासाला पीडित मुलगी कंटाळली होती.

मात्र वडिलांबाबत घरातल्या व्यक्तींना सांगायला ती घाबरत होती. अशा वेळी तिच्या एका मिञाजवळ पीडित मुलीने आपल्यावर होणाऱ्या अत्याचाराची माहिती देत मनातल्या दुःखाला वाट मोकळी केली. या घटनेनंतर पीडितेच्या मित्राने आईसोबत पोलिस ठाण्यात धाव घेतली. दरम्यान मुलीच्या तक्रारीच्या आधारावर पोलिसांनी गुन्हा नोंदवत आरोपी बापाला अटक केली आहे. या दुर्देवी घटनांमुळे परिसरात अत्यंत संताप आणि चिड व्यक्त करण्यात येत आहे. बापाच्या नात्याला काळीमा फासणाऱ्या दोन्ही आरोपींना कडक कारवाई करण्याची अपेक्षा व्यक्त केली जात आहे.