Fake Garba Passes: गरबा, 6 लाखांचे बनावट पास अन् 6 विद्यार्थी...; मुंबईतील स्टेशनरी स्टोअरमध्ये नेमकं काय घडलं?

भाजपचे विधान परिषदेचे आमदार प्रवीण दरेकर यांनी आयोजित केलेल्या गरबा कार्यक्रमासाठी 6 लाख रुपयांचे 600 बनावट पास छापल्याच्या आरोपावरून बोरिवली पोलिसांनी मंगळवारी सहा विद्यार्थ्यांना अटक केली. या आरोपी विद्यार्थ्यांनी अवघ्या पाच दिवसां 400 पासची विक्री केल्याचे एका आरोपीने सांगितले.

दरम्यान अटक करण्यात आलेल्या एकाही आरोपीची गुन्हेगारी पार्श्वभूमी नसल्याचे पोलिसांनी सांगितले. ते पुढे म्हणाले की या प्रकरणी एक टीप मिळाली होती, तर एका इव्हेंट मॅनेजमेंट व्यावसायिकाने तक्रार देखील केली होती.

बोरिवली पश्चिम येथील बाळासाहेब ठाकरे मैदानावर दरवर्षी आयोजित करण्यात येणाऱ्या रायगड प्रतिष्ठान रंगराज गरब्यासाठी काही लोक बनावट पासेस विकत असल्याची माहिती पोलिसांना मिळाली होती, त्यानंतर ही कारवाई करण्यात आली. याबाबतचे वृत्त फ्री प्रेस जर्नलने दिले आहे.

या प्रकरणाची चौकशी सुरू करत पोलिसांनी नालासोपारा येथून अंश नागर (20) या आरोपीचा त्याच्या संपर्क क्रमांकावरून माग काढला. त्यानंतर पोलिसांनी थेट आरोपीला गाठले आणि बनावट पास कोठे बनवले याची चौकशी केली. शेवटी त्याने सांगितले की, त्याने कांदिवलीच्या चामुंडा स्टेशनरी स्टोअरमध्ये बनावट पास छापण्याचा कट रचला होता. हे स्टेशनरी स्टोअर या प्रकरणातील सहआरोपी मनोज चावडा (20) हा चालवतो. त्याने 600 पास छापले आणि ते वेगवेगळ्या ग्रुपमध्ये वितरित केले, नागर म्हणाला की, त्यांनी 3 ते 7 ऑक्टोबर दरम्यान 400 पास विकले.

भावा मकवाना, राज मकवाना आणि यश मेहता अशी उर्वरित आरोपींची नावे आहेत. हे सर्वजण १९ वर्षांचे असून ते कांदिवलीचे रहिवासी आहेत. त्यांचा साथीदार केयूर नाय हा 20 वर्षांचा आहे, तर प्रेम चावडा (19) हा अजूनही फरार आहे.

गेल्या काही वर्षांत नवरात्र मोहत्स्वाचा काळात मोठ्या शहरात होणाऱ्या गरबा कार्यक्रमांमध्ये मोठ्या प्रमणात गैरप्रकार वाढले आहेत. त्यामुळे हे गैरप्रकार रोखण्यासाठी आयोजक पासशिवाय कार्यक्रमात प्रवेश देत नाहीत.