दिवा - दिवा शहरातील दिवा चौकात नेहमीच मोठी वाहतूक कोंडी होते. विशेषतः गर्दीच्या वेळेत सायंकाळी ७ ते रात्री ९ या काळात तर इथे तासभर वाहनांच्या रांगा लागतात. दिवा स्टेशन कडून शीळ फाटा आणि आगासन कडे जाणारी व येणारी वाहने या चौकात येऊन कोंडीत अडकतात. त्यामुळे ही वाहतूक कोंडी सोडवण्यासाठी वाहतूक पोलीसाची नेमणूकीची मागणी दिवा मनसेने केली आहे.
दिव्यातील चौकात दिवा स्थानकातून, शीळ मार्गावरुन, आगासन- बेडेकर नगरवरुन रिक्षा, दुचाकी तर चार चाकी येतात. अन् त्याचवेळी त्या चौकात नवी मुंबई, डोंबिवली आणि ठाण्यावरुन येणाऱ्या बसेसमुळे मोठी वाहतूक कोंडी होते. तर तेथे संध्याकाळच्या वेळी वाहतूक पोलीस उपलब्ध नसल्याने कोणीही कशाही गाड्या दामटवून संपूर्ण वाहतुकीचा बोजवारा उडवून देतात.
अशा बेशिस्त वाहनचालकांवर कारवाई करण्यासाठी वाहतूक पोलीस उपलब्ध असल्यास दिवा चौकात होणाऱ्या वाहतूक कोंडीला चाप बसेल, असे मनसेने आपल्या निवेदनात म्हटले आहे. वाहतूक विभागाचे कर्मचारी दिवसा येऊन वाहनांवर कारवाई करून जातात.
पण संध्याकाळच्या ऐन गर्दीच्या वेळेस वाहतुकीचे नियमन करण्यासाठी किमान रात्री ९ वाजेपर्यंत वाहतूक पोलीस दिव्यात असणे गरजेचे आहे. आणीबाणीच्या परिस्थितीत ही वाहतूक कोंडी जीवावर देखील बेतू शकते याकडे दिवा मनसेने वाहतूक पोलीसांचे निवेदनातून लक्ष वेधले आहे.
जर वाहतूक पोलिसांकडून वाहतुकीचे नियमन करण्यासाठी वाहतूक पोलीस उपलब्ध होत नसतील, अन् त्यामुळे दिवसेंदिवस वाहतूक कोंडीने उग्र रुप घेतल्यास मनसेचे महाराष्ट्र सैनिक रस्त्यावर उतरून दिवा चौकातील वाहतूक कोंडीची नियमन करतील, असा इशारा मनसेने या निवेदनातून दिला आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.