एसटी कामगारांनी मानले 'चितळे बंधूं'चे आभार

मुंबई - पुणे येथील "चितळे बंधूं'च्या मिठाईंच्या जाहिरातीमध्ये एसटीचालकाला प्रवाशांच्या भावाचा दर्जा देण्यात आल्याने एसटी कामगारांनी नुकतीच मुंबईतील "चितळे बंधूं'च्या दुकानात सामूहिक मिठाई खरेदी करत कृतज्ञता व्यक्त केली. एसटी चालकांची प्रवाशांशी असलेली बांधिलकी आणि "चितळे बंधूं'च्या मिठाईचे वैशिष्ट्य दर्शवणारी ही जाहिरात सध्या सोशल मीडियावर चर्चेचा विषय बनली आहे. एसटी चालक रात्री रस्त्याच्या थांब्यावर उतरणाऱ्या महिलेला मदत करतो. ती महिला चालकाला राखी बांधून परतफेड करते, असे दर्शवणारी ही जाहिरात सध्या समाजमाध्यमांमध्ये व्हायरल होत आहे.

दरम्यान, या जाहिरातीमुळे एसटी कामगार आणि प्रवाशांचे नाते घट्ट होणार आहे. जाहिरातीमध्ये एसटी कामगारांचा गौरव केल्याने त्यांच्या कष्टाला पावती मिळाली आहे, अशी प्रतिक्रिया "महाराष्ट्र एसटी कर्मचारी कॉंग्रेस'चे सरचिटणीस श्रीरंग बरगे यांनी दिली.