Mumbai News : शिक्षणाच्या जिद्दीने केली परिस्थितीवर मात

डोंबिवली : डोंबिवलीत राहणाऱ्या छाया वाघमारे यांनी वयाच्या 51 व्या वर्षी 10 वी च्या परीक्षेत 66 टक्के गुण मिळवित घवघवीत यश संपादन केले आहे. लहान वयात लग्न झाल्याने संसाराची जबाबदारी अंगावर पडली. घरची परिस्थिती बेताची त्यावर मात करत दोन मुलांचे शिक्षण पूर्ण करत मुलीचे लग्न देखील लावून दिले. यानंतर आपल्या शिक्षणाची जिद्द पूर्ण करण्यासाठी त्यांनी 10 वी ला प्रवेश घेतला. 35 वर्षाच्या गॅप नंतर छाया यांनी पहिल्या प्रयत्नांतच दहावीची परीक्षा उत्तीर्ण केली आहे.

छाया वाघमारे या डोंबिवली पश्चिमेला राहतात. मूळच्या कोल्हापुरच्या असलेल्या छाया यांचे शालेय शिक्षण मुंबईत झाले. मात्र लहान वयातच लग्न झाल्याने संसाराची जबाबदारी त्यांच्यावर पडली. त्यांना एक मुलगा व मुलगी असून मुलांचे शिक्षण पूर्ण करण्यासाठी त्यांनी नोकरी केली. पतीचे अकाली निधन झाले आणि मुलांची जबाबदारी छाया यांच्या खांद्यावर आली. मात्र नडगमुकता परिस्थितीवर मात करत त्यांनी नोकरी करत संसाराचा गाडा हाकण्यास सुरुवात केली छाया यांची दोन्ही मुले प्रथमेश आणि प्रियंका यांनी उच्च शिक्षण घेतले असून दोघेही नोकरी करतात.

छाया यांच्या मुलींचे लग्न वर्षभरापूर्वी झाले आहे. मुलीचे लग्न झाल्यानंतर संसारातून थोडा मोकळा वेळ मिळाल्याने आपले शिक्षणाचे स्वप्न पूर्ण करण्याचे त्यांनी ठरवले. मागील वर्षीच त्यांनी नर्सिंग ची परीक्षा दिली असून त्यात त्या उत्तीर्ण झाल्या आहेत. यानंतर त्यांनी दहावीची परीक्षा देखील देण्याचे ठरवले. मुबंई येथील व्ही.एस.एम. भायखळा नाईट हायस्कूल येथे ऍडमिशन घेतले. कोणताही क्लास लावलेला नसताना केवळ शाळेत शिकवल्या जाणाऱ्या अभ्यासक्रमावर नियमित दिवस रात्र सराव करत त्यांनी परीक्षेत 66.20 टक्के गुण प्राप्त केले आहेत.

यावेळी छाया यांनी बोलताना सांगितले की परीक्षा उत्तीर्ण झाल्याचा मला खूप आनंद आहे. शाळेतील मुख्याध्यापक आनंद पाटील सर त्याच सोबत सुरेश काळे सर, कदम सर, गटरी सर, मासुम ट्रस्टचे खर्डे सर, कविता गीते मॅडम यांच्या मार्गदर्शनामुळे आणि सहकार्यामुळेच मला 10 वीच्या परीक्षेत चांगल्या गुणांनी उत्तीर्ण होता आले.