आयआयटी-मुंबई करणार 'द्रूतगती'वर तांत्रिक सर्वेक्षण

मुंबई : मुंबई-पुणे द्रूतगती महामार्गावर (एक्‍स्प्रेस-वे) आडोशी बोगद्याजवळ वारंवार दरड कोसळण्याच्या घटना टाळण्यासाठी यासंदर्भात तांत्रिक सर्वेक्षणासाठी महाराष्ट्र राज्य रस्ते विकास महामंडळ आयआयटी-मुंबईची मदत घेणार आहे. या ठिकाणी महिनाभरात तीन वेळा दरड कोसळली होती. 

एक्‍स्प्रेस-वेच्या उभारणीदरम्यान करण्यात आलेली वृक्षतोड आणि अशास्त्रीय पद्धतीने डोंगर कापल्याने दरडी कोसळण्याचा धोका वाढल्याचे भूगर्भशास्त्रज्ञांचे मत आहे. त्यामुळे मार्गाच्या परिसरातील भूस्तर कमकुवत झाला आहे. पावसाचे पाणी डोंगरांच्या भेगांमध्ये जाऊन नैसर्गिक भेगा वाढल्याने भूस्खलनाचा धोका वाढला आहे. आडोशी बोगदाच्या उभारणीच्या वेळी डोंगर ट्रेचिंग पद्धतीने कापला गेला आहे.

खरे तर 45 ते 50 अंशांत डोंगर कापणे आणि मार्ग करणे ही योग्य पद्धत आहे. परंतु येथील डोंगर 70 ते 80 अंशांत कापले गेल्याने दरडीचा धोका वाढला आहे. अशा परिस्थितीत 'वाळा' वनस्पतीची लागवड करणे हा एक पर्याय आहे. परंतु यासोबतच अन्य काही उपाययोजनांच्या चाचपणीसाठी आयआयटी-मुंबईच्या तज्ज्ञांची मदत घेण्यात येणार आहे. त्यांच्या मदतीने दरड कोसळण्याच्या ठिकाणाचा अभ्यास केला जाणार आहे. 

जिओग्राफिक इन्फॉरमेशन तज्ज्ञांची (जीआयएस) तसेच सॅटेलाइट इमेजची मदतही घेतली जाणार आहे. यापूर्वी कळसूबाईच्या शिखर परिसरातील दरडींच्या जागा निश्‍चित केल्या होत्या व त्यावर उपाय योजले होते. त्याच धर्तीवर एक्‍स्प्रेस-वेवरील काम करणे गरजेचे असल्याने, एमएसआरडीसी याविषयी आयआयटीची मदत घेणार आहे.