मुंबईसह महाराष्ट्र गारठला! 

मुंबई : मुंबईसह संपूर्ण राज्यात थंडीने जोर धरला आहे. गुरुवारी (ता. 16) किमान तापमानात घट नोंदवण्यात आली. नाशिकमध्ये गुरुवारी राज्यातील सर्वांत कमी 9.8 अंश सेल्सिअस तापमानाची नोंद झाली. मुंबईतील सांताक्रूझ येथे किमान तापमान 15.4 आणि कुलाबा येथे 17.6 अंश सेल्सिअस होते. शुक्रवारी 9ता. 17) मुंबईतील किमान तापमान 14 अंशापर्यंत खाली येण्याचा अंदाज वर्तवण्यात आला आहे. 

मुंबई पालिका शाळेची कमाल,.. रोबोला बाहुबल

वाढलेल्या थंडीमुळे मुंबईसह राज्यात हवेतून पसरणारे स्वाईन फ्लूसारख्या आजारांसह ताप, सर्दी, खोकल्याचा आजारही वाढण्याची शक्‍यता आहे. उत्तरेपेक्षा राज्यातील हवेचा दाब कमी झाल्याने उत्तरेकडून राज्यात थंडे वारे वाहू लागले आहेत. त्यामुळे राज्यातील तापमानात घट होऊ लागली आहे, असे हवामान अभ्यासक डॉ. रामचंद्र साबळे यांनी सांगितले. 
तापमान आठ अंशापेक्षा खाली आल्यास पिकांना धोका निर्माण होऊ शकतो. पिकांची पोषकक्रिया बंद होऊन पिके कोमेजून जातात, असे तज्ज्ञांचे म्हणणे आहे. काही वर्षांपूर्वी राज्याचे तापमान 4-5 अंशापर्यंत खाली आले होते. त्या वेळी सुर्यफुलाच्या पिकावर दुष्परिणाम झाला होता, असा दावाही डॉ. साबळे यांनी केला. राज्यात तापमान आठ अंशाच्या खाली येण्याची शक्‍यता आहे. जास्तीत जास्त एक-दोन दिवस काही तुरळक ठिकाणी अशी परिस्थिती राहू शकते; मात्र संपूर्ण राज्यावर त्याचा परिणाम जाणवणार नसल्याचे सध्याच्या परिस्थितीवरून दिसते, असेही डॉ. साबळे यांनी सांगितले. 

अबब! कुत्र्यांच्या नसबंदीसाठी एक कोटीचा खर्च

मुंबईत आज हुडहूडी 
मुंबईतील तापमानातही प्रचंड घट होऊ लागली आहे. बुधवारपेक्षा गुरुवारी तापमानात दोन अंशापर्यंतची घट झाली. शुक्रवारीही तापमानात घट होण्याचा अंदाज मुंबई वेधशाळेने वर्तवला आहे. मुंबईत शुक्रवारी किमान तापमान 14 अंशापर्यंत खाली येण्याची शक्‍यता आहे. गुरुवारी कुलाबा येथे कमाल 26 आणि किमान 17.6, तर सांताक्रूझ येथे कमाल 25 अंश आणि किमान 15.4 अंश सेल्सिअस तापमानाची नोंद झाली. 

पुण्यात धुके दाटणार 
पुणे परिसरात दोन दिवसांपासून पहाटे धुके पडत आहे. पुढील दोन दिवसांत धुके आणखी दाट होईल, अशी शक्‍यता वर्तवली जात आहे. पुण्यात सध्या 12.1 अंश सेल्सिअस नोंदला गेलेला किमान तापमानाचा पारा पुढील दोन दिवसांत 11 अंश सेल्सिअसपर्यंत खाली येईल.