Dombivli News : वाईन शॉपवर डल्ला मारत चोरट्याची गटारी; कल्याण स्टेशन परिसरातील घटना

डोंबिवली - कल्याण स्टेशन परिसरातील वाईन शॉप मध्ये शिरून दोन चोरट्यांनी डल्ला मारत शॉप मधील 4 लाख 75 हजार रुपये लंपास केले आहेत. सीसीटीव्ही मध्ये ही चोरीची घटना कैद झाली आहे. सकाळी दुकान चालक दुकानात आले असता चोरीची घटना उघडकीस आली.

दुकानातील एक्झॉस फॅनच्या जागेतून चोरटे दुकानात शिरले होते. दुकानातील एवढी मोठी रक्कम त्यांच्या हाती लागल्याने त्यांची गटारी जोरात झाली असल्याची चर्चा होती. याप्रकरणी महात्मा फुले चौक पोलीस ठाण्यात गुन्हा दाखल करण्यात आला असून पोलीस चोरट्याचा शोध घेत आहेत.

कल्याण पश्चिमेला स्टेशन परिसरात गिरीष वाईन शॉप आहे. शनिवारी सकाळी वाईन शॉप चालक दुकानात आले असता, त्यांना दुकानात सर्व वस्तू अस्ताव्यस्त आढळून आल्या. तसेच वाईन शॉपमधील लॉकरमधून 4 लाख 75 हजार रुपये गायब झाले होते. या वाईन शॉपच्या मागच्या बाजूला एक्झॉस्ट फॅन लावण्यात आले होते. तो फॅन काढून चोरट्यानी दुकानात प्रवेश केला होता. दुकान चालकाने दुकानाचा सीसीटीव्ही पाहिल्यानंतर हा सगळा प्रकार लक्षात आला.

पहाटे चारच्या सुमारास दुकानात दोन चोर शिरले होते. एक्झॉस्ट फॅन काढून त्यांनी दुकानात प्रवेश केला. वाईन शॉपमधील 4 लाख 75 हजार रुपये घेऊन चोर पसार झाले. वाईन शॉप चालकाने कल्याणच्या महात्मा फुले पोलीस ठाण्यात याप्रकरणी तक्रार दिली आहे. पोलिसांनी सीसीटीव्ही फुटेजच्या आधारे तपास सुरु केला आहे. सीसीटीव्हीत चोरट्यांचे चेहरे दिसून येत आहेत. लवकरच दोन्ही चोरटे अटक केले जातील अशी माहिती पोलिसांनी दिली आहे.