Mumbai Local News: मुंबईकरांचे हाल होणार बंद; आज ब्लॉकचा शेवटचा दिवस!

Mumbai Local News: पश्चिम रेल्वेवर खार-गोरेगाव स्थानकांदरम्यान पाचव्या-सहाव्या मार्गिकेच्या कामासाठी सुरू असलेल्या ब्लॉकचा उद्या (ता. ५) अखेरचा दिवस आहे. त्यानुसार दिवसभरात ११० लोकल फेऱ्या रद्द असणार आहेत.

मात्र सोमवारपासून (ता. ६) पश्चिम रेल्वे मार्गावर नियमित लोकल सेवा धावणार आहेत. तसेच सहावी मार्गिकाही लवकरच प्रवासी सेवेत येणार असल्याची माहिती रेल्वे प्रशासनाने दिली.

पश्चिम रेल्वेवर सोमवार (ता. ३०) ते शुक्रवारपर्यंत (३) दिवसाला ३१६ फेऱ्या रद्द करण्याचे नियोजन केले होते; मात्र दिवाळीच्या तोंडावर नागरिकांची गैरसयोय होऊ नये म्हणून रद्द केलेल्या अनेक लोकल सेवा पूर्ववत करण्यात आल्या होत्या.

त्यामुळे प्रवाशांना थोडा दिलासा मिळाला. पश्चिम रेल्वेवर २९ दिवसांच्या ब्लॉकचा रविवारी अखेरचा दिवस असल्याने दिवसभरात ११० लोकल फेऱ्या रद्द असणार आहेत. नवीन मार्गिकेमुळे वांद्रे टर्मिनसवरून धावणाऱ्या गाड्यांसाठी दोन कॉरिडॉर उपलब्ध होतील.

या मार्गावर मेल-एक्स्प्रेससाठी समर्पित कॉरिडॉर असल्यास लोकल सेवा वाढण्यास मदत होणार आहे, तसेच लोकल सेवांच्या वक्तशीरपणात सुधारणा होणार असल्याची माहिती वरिष्ठ अधिकाऱ्यांनी ‘सकाळ’ला दिली.