विनाअनुदानित शिक्षकांचा पेपर तपासणीवर बहिष्कार

मुंबई : शालेय शिक्षण विभागाकडून (School education board) राज्यातील कायम विनाअनुदानित शाळा (Non granted school) कृती समितीच्या मागण्यांकडे दुर्लक्ष करण्यात आले आहे. त्यामुळे समितीकडून दहावी आणि बारावीच्या पेपरतपासणीवर (ssc and hsc exam papers) बहिष्कार टाकण्यात आल्याची माहिती समितीचे मुंबई अध्यक्ष संजय डावरे (sanjay daware) यांनी दिली. विविध मागण्यांसाठी आम्ही २४ मार्च रोजी शालेय शिक्षण विभागाला निवेदन दिले होते. त्या वेळी योग्य निर्णय घेण्यात न आल्यास राज्यभरातील शिक्षक दहावी-बारावीच्या पेपरतपासणीवर बहिष्कार (Boycott) घालतील, असा इशारा दिला होता.

तरीही शिक्षण विभागाकडून कोणतीच दखल घेण्यात न आल्याने आम्ही बहिष्कार सुरू केल्याची माहिती विनाअनुदानित शाळा कृती समितीचे मुंबई अध्यक्ष संजय डावरे यांनी दिली. त्यामुळे दहावी, बारावीच्या निकालावर परिणाम झाल्यास त्यास शिक्षण विभाग जबाबदार राहील, असेही डावरे म्हणाले.

पर्यायी व्यवस्था करणार

दहावी आणि बारावीच्या पेपरतपासणीचे काम राज्यभरात सुरळीतपणे सुरू आहे. काही संघटनांनी पेपर तपासणीवर बहिष्कार टाकल्यास आणि तपासणीचे काम रखडल्यास तातडीने पर्यायी व्यवस्था केली जाईल, त्याचा कोणताही परिणाम निकालावर होणार नाही, असे स्पष्टीकरण राज्य शिक्षण मंडळाच्या वतीने देण्यात आले.