एसटी संपावर तोडगा काढा! सुधीर मुनगंटीवार यांची मागणी

मुंबई : राज्यात गेल्या पाच महिन्यांपासून एसटी कर्मचाऱ्यांचा संप (ST workers strike) सुरू आहे. राज्य सरकारने (Maharashtra Government) पक्षीय राजकारण आणि राजकीय अभिनिवेश बाजूला सारून संपावर तातडीने तोडगा काढावा आणि महाराष्ट्राच्या जीवनवाहिनीला (Maharashtra lifeline) पुन्हा गती द्यावी, अशी मागणी विधिमंडळ लोकलेखा समितीचे अध्यक्ष आमदार (sudhir mungantiwar) सुधीर मुनगंटीवार यांनी केली.

राज्यात २९ ऑक्टोबरपासून सुरू झालेला एसटी कर्मचाऱ्यांच्या संपावर अद्याप तोडगा निघाला नाही. आतापर्यंत ४५ एसटी कर्मचाऱ्यांनी आत्महत्या केल्या. जळगाव जिल्ह्यातील यावल आगाराच्या शिवाजी पाटील या चालकाने रेल्वेखाली आत्महत्या केली. ही घटना हृदय हेलावणारी आहे. संपामुळे ६२ ते ६५ हजार एसटी कर्मचाऱ्यांचे भवितव्य धोक्यात आले आहे तसेच एसटी महामंडळाचे मोठ्या प्रमाणात नुकसान होत आहे.

नियमित बससेवा नसल्याने ऐन परीक्षेच्या काळात ग्रामीण भागातील विद्यार्थ्यांना पायपीट करावी लागत आहे. एकूणच महाराष्ट्रातील सर्वसामान्य, गोरगरीब जनता त्यामुळे वेठीस धरली गेली आहे. त्यामुळे महाविकास आघाडी सरकारने तातडीने या मुद्द्यावर तोडगा काढावा, अशी मागणी मुनगंटीवार यांनी केली आहे.