अलिबाग : जेएसडब्ल्युवर गुन्हा दाखल करा; पंडित पाटील यांचा आक्रमक पवित्रा

अलिबाग : धरमतर खाडी परिसरातील गावांमध्ये ध्वनी, वायू आणि जलप्रदूषणास (water pollution) जेएसडब्ल्यू कंपनी (JSW company) कारणीभूत ठरली आहे, असा आरोप करून या कंपनीवर कारवाई करण्याची मागणी अलिबागचे माजी आमदार पंडित (सुभाष) पाटील (Pandit patil) यांनी जिल्हाधिकाऱ्यांकडे केली. या संदर्भात त्यांनी पोयनाड पोलिस ठाण्यात (Poynad police station) तक्रार दाखल केली आहे. धरमतर खाडी (Dharamtar creek) परिसरातील पेझारी, कुसुंबळे, खारकारवी, डोलवी, शहाबाज यांसारख्या गावांमध्ये जेएसडब्ल्यूमुळे प्रदूषण होते. या भागात दिवसभर मोठ्या प्रमाणात धूळ उडत असल्याने नागरिकांना श्वसनाचा त्रास जाणवत आहे, असे पंडित पाटील यांनी सांगितले.

जलप्रदूषणामुळे येथील मासेमारीचा व्यवसायही बुडालेला आहे. पिण्याचे पाणी देखील दूषित झाले आहे. त्याचबरोबर मागील काही दिवसांत ध्वनिप्रदूषणाचा सामना नागरिकांना करावा लागत आहे. भल्या पहाटे कंपनीतून येणाऱ्या आवाजाने येथील नागरिकांना झोपेचा त्रास जाणवू लागला आहे, असा आरोप पाटील यांनी केला आहे. यामुळे कंपनीवर गुन्हा दाखल न झाल्यास शेतकरी कामगार पक्ष आक्रमक पवित्रा घेणार आहे, असा इशारा पंडित पाटील यांनी दिला.

जेएसडब्ल्यू कंपनीतून मिळणारा फायदा दुसऱ्यांनी घ्यायचा आणि त्रास येथील नागरिकांनी भोगायचा, हे योग्य नाही. प्रदूषण कमी करण्यासंदर्भातही कोणत्याच विभागाकडून या कंपनीला विचारणा होत नाही, त्यामुळे कंपनी प्रशासन बेलगाम झाले आहे.

- पंडित पाटील, माजी आमदार.

माजी आमदार पंडित पाटील यांनी पोयनाड पोलिस ठाण्यात तक्रार अर्ज केला आहे. यात त्यांनी कंपनीमुळे प्रदूषण होत असल्याचे नमूद केले आहे. संबंधित कंपनी ही वडखळ पोलिस ठाण्याच्या हद्दीत असल्याने तपासासाठी हा अर्ज वडखळ पोलिसांकडे पाठविण्याची कार्यवाही सुरू आहे.

- राहुल अतिग्रे, पोलिस निरीक्षक, पोयनाड ठाणे.