राणीच्या बागेत वाघिणीने दिला बछड्याला जन्म

राणीच्या बागेत वाघाच्या बछड्याचा जन्म सकाळ वृत्तसेवा मुंबई, ता. १७ : भायखळा येथील राणीच्या बागेत अनेक दशकांनंतर वाघाच्या बछड्याचा जन्म झाला. औरंगाबादच्या प्राणिसंग्रहालयातून आणलेल्या वाघांच्या जोडीने दोन वर्षांत मुंबईला गोड बातमी दिली आहे. या बछड्यासह पेंग्विनच्या पिल्लाचेही मंगळवारी (ता. १८) नामकरण होणार आहे. भायखळ्याच्या वीरमाता जिजाबाई भोसले उद्यान व प्राणिसंग्रहालयातील शेवटच्या वाघाचा मृत्यू २००६ मध्ये झाला. त्यानंतर दोन वर्षांपूर्वी औरंगाबादहून शक्ती आणि करिष्मा ही वाघाची जोडी आणण्यात आली. १४ जानेवारीला करिष्मा वाघिणीने बछड्याला जन्म दिला आहे. सध्या वाघिणीला बछड्यासह डॉक्टरांच्या देखरेखीखाली ठेवण्यात आले आहे. वाघाच्या या बछड्याबरोबरच गेल्या ऑगस्ट महिन्यात जन्मलेल्या पेंग्विनचेही उद्या नामकरण करण्यात येणार आहे. महापौरांच्या उपस्थितीत सकाळी ११ वाजता हा कार्यक्रम होणार आहे.