KDMC : हिंदूत्वाच्या मुद्द्याला राजकीय रंग; पालिका निवडणुकांची रणधुमाळी

डोंबिवली : पालिका निवडणुकांची (kdmc election) रणधुमाळी सुरू झाली असून विकासकामांचा मुद्दा या निवडणुकीत गाजण्याची शक्यता असतानाच हिंदुत्वाच्या मुद्द्यावरून (Hinduism politics) पालिका निवडणुकीला रंग दिला जात आहे. महाविकास आघाडी सरकारमधील (mva government) काँग्रेस पक्षाचे लांगुलचालन करण्यासाठी हिंदुत्वाचे विचारच पुसून टाकण्याचा प्रयत्न शिवसेना करत असल्याचा आरोप करीत भाजपचे आमदार रवींद्र चव्हाण (Ravindra chavan) यांनी शिवसेनेला डिवचले आहे. यावर शिवसेनेचे मुळ हिंदुत्व असून त्यांनी आम्हाला हिंदुत्व शिकवू नये, असा प्रतिटोला शिवसेनेने लगावला आहे.

कल्याण डोंबिवली पालिकेच्या आगामी सार्वत्रिक निवडणुकीसाठी प्रभागांची प्रारूप यादी जाहीर झाली आहे. यामध्ये भाजपचे काही प्रभाग हे इतर प्रभागांशी जोडले गेल्याने भाजपमधील प्रस्थापितांचीच कोंडी झाली आहे. नव्या प्रभागरचनेत डोंबिवलीतील स्वा. सावरकर रस्ता या प्रभागाचे नावच रद्द करण्यात आले आहे. त्यासोबतच स्वातंत्र्यदिनी शिवसेनेने लावलेल्या बॅनरवर स्वा. सावरकरांचे छायाचित्र नव्हते. सत्तेतील काँग्रेसचे लांगुलचालन करण्यासाठी डोंबिवलीतून हिंदुत्ववादी विचार संपविण्याचा शिवसेनेचा प्रयत्न असल्याचा आरोप आमदार चव्हाण यांनी केला आहे.

शिवसेनेचे डोंबिवली शहरप्रमुख राजेश मोरे यांनी स्वातंत्र्यदिनी शहरात जे बॅनर लावले होते त्यामध्ये सावरकर रस्ता प्रभागात सावरकर यांची छायाचित्रे नव्हती. महाविकास आघाडी सरकारमध्ये ‘सावरकरद्वेष’ किती ठासून भरला आहे, हे या दोन घटनांवरून दिसून येते, असे म्हणत चव्हाण यांनी हिंदुत्वाच्या मुद्द्यावरून शिवसेनेला डिवचले. चव्हाण यांनी केलेल्या आरोपांचे शिवसेनेने खंडण केले असून शिवसेनेचे डोंबिवली शहरप्रमुख राजेश मोरे म्हणाले, आमदार चव्हाण यांनी प्रथम डोंबिवलीतील आपली कामे करावीत. सावरकरांना भारतरत्न द्यावा म्हणून शिवसेनेने मोठी स्वाक्षरी मोहीम राबवली, असा पलटवार मोरे यांनी भाजपवर केला.

धूळ खात पडलेले डोंबिवलीतील संकल्प तीर्थ विकसित केले. शिवसेनेचे मूळच हिंदुत्व आहे. त्यामुळे आम्हाला कुणी हिंदुत्व शिकवू नये. ज्या सावरकर रस्ता प्रभागात आमदार चव्हाण यांचे कार्यालय आहे तिथे सावरकरांचे छायाचित्र आहे का?

- राजेश मोरे, डोंबिवली शहरप्रमुख, शिवसेना