नवी मुंबईतील खाडीत डॉल्फिनचे दर्शन

वाशी : नवी मुंबईमधील (Navi Mumbai creek) खाडीत गुरुवारी सकाळी डॉल्फिन (Dolphin Fish) मनसोक्त विहार करताना आढळला. स्थानिक मच्छीमार लक्ष्मण भोईर याने त्याला आपल्या मोबाइलमध्ये चित्रित (video clip) केले असून सध्या सोशल मीडियावर (Social media) डॉल्फिनच्या विहाराची चर्चा रंगत आहे. गुरुवारी भरतीच्या वेळेला वाशी ते मानखुर्द खाडीदरम्यान रेल्वे पुलानजीक डॉल्फिन मच्छीमार लक्ष्मण भोईर याला दिसला.

यावेळी वाशी गावातील काही मच्छीमार परिसरात मासेमारी करीत होते. भोईर यांनी त्याचे चित्रीकरण केले. या पूर्वी देखील परिसरात डॉल्फिन आढळला आहे. भरतीच्या वेळी खाडीकिनारी मासे येतात, तसेच भक्ष्याच्या शोधात डॉल्फिनही यायचे. मात्र खाडीवर पूल उभारल्‍यानंतर डॉल्फिनचे दर्शन दुर्मिळ झाले आहे. आता वर्षांतून कधीतरीच डॉल्फिनचे दर्शन होत असल्याचे भोईर यांनी स्पष्ट केले.