मानखुर्द : घरभाडे देण्यास पैसे नसल्याने मुलाचे अपहरण

मानखुर्द : मानखुर्दच्या हिरानंदानी-आकृती इमारत परिसरातून बुधवारी (ता.१६) अपहरण झालेल्या अल्पवयीनचा (Minor girl abduction) शोध मानखुर्द पोलिसांनी (Mankhurd police station) अवघ्या ६ तासांत लावून त्याला सुखरूप पालकांच्या ताब्यात दिले. या गुन्ह्यात ज्योती बनसोडे (३२) या महिलेला ताब्यात घेऊन अटक (culprit arrested) करण्यात आली आहे. आर्थिक चणचणीमुळे घरभाडे देण्यास पैसे नव्हते. त्यामुळे हा गुन्हा केल्याची कबुली महिलेने पोलिसांना दिली.

हिरानंदानी आकृती परिसरात राहणाऱ्या अल्पवयीनचे बुधवारी दुपारी बाराच्या सुमारास अपहरण झाल्याची तक्रार त्याच्या पालकांनी पोलिस ठाण्यात केली होती. त्यानुसार उपनिरीक्षक संदीप रहाणे व दत्तात्रय मालवेकर यांच्या नेतृत्वात गुन्हे प्रकटीकरण पथक व हरवलेल्या व्यक्तींचा शोध घेणाऱ्या पथकाने तपासाला सुरुवात केली. गोवंडीतील आगरवाडी येथील दत्त मंदिराबाहेरील सीसी टीव्ही कॅमेऱ्यात अल्पवयीन व अपहरणकर्ती ज्योती कैद झाले होते. हा धागा सापडताच पोलिसांनी ज्योतीचे मोबाईल लोकेशन मिळवले. ती कल्याण स्थानकात होती. त्यानंतर मानखुर्द परिसरात आल्याची माहिती खबऱ्यांनी देताच पोलिसांनी तिला ताब्यात घेतले.

मुलाबाबत चौकशी केली असता तिने उडवाउडवीची उत्तरे देऊन दिशाभूल करण्याचा प्रयत्न केला; परंतु सीसी टीव्ही फुटेज दाखवल्यानंतर तिची बोबडी वळली आणि गुन्हा कबूल केला. या मुलाला तिने बोईसरच्या काटकरपाडा परिसरात सोडल्याचे सांगितले. त्यानुसार पोलिसांनी बोईसर येथून मुलाला ताब्यात घेऊन त्याच्या पालकांकडे सोपवले.