वसई-विरारमध्ये कायदा सुव्यवस्थेचा प्रश्न ऐरणीवर; भरदिवसा गोळीबाराच्या घटना वाढल्या

वसई : वसई-विरार (Vasai-Virar) शहरात गुन्हेगारांमध्ये (criminals) पोलिसांचा दरारा कमी झाला आहे का, असा प्रश्न सामान्य नागरिक विचारत आहेत. कारण मागील काही दिवसांपासून शहरात दिवसाढवळ्या हत्या, गोळीबाराच्या घटना (Murder crime) घडत आहेत. त्यामुळे शहरातील कायदा सुव्यवस्थेचा प्रश्न ऐरणीवर आला आहे. ६ फेब्रुवारी रोजी विरार येथे भरदिवसा गोळीबाराची घटना (bullet firing crime) घडली. यात एकाचा मृत्यू झाला; तर दोन दिवसांनी वसईच्या एका लॉजमध्ये प्रियकराने प्रेयसीची हत्या केली. २८ तारखेला विरारमध्ये ठेकेदारावर गोळीबार करून जीवघेणा हल्ला (Attempt to murder) झाला. हे थांबते न थांबते तोवर विवाहाला विरोध करत विवाहित महिलेच्या भावाने भावजीवर गोळी झाडली. यात तो जखमी झाला. चार दिवसांत घडलेल्या या घटनेमुळे शहर हादरले आहे.

वसई-विरार शहराची वाढती लोकसंख्या व दाटीवाटीच्या वस्त्या असल्याने कोण कुठून आले आहे, याचा शोध घेणे कठीण होत आहे. गुन्हेगारी स्वरूपाचे लोक अशा वस्तीत आश्रय घेतात व अनेकदा गुन्हे करून पसार होत असतात. एकीकडे मिरा-भाईंदर वसई-विरार पोलिस आयुक्तालयाकडून गुन्ह्यांबाबत तपास तातडीने केला जात आहे; मात्र तरीदेखील गुन्हेगारांवर जरब बसत नसून हत्या, चोरीच्या घटना वाढत आहे. त्यामुळे आयुक्तालयासमोर कायदा व सुव्यवस्थेचा प्रश्न चिंतेचा विषय बनत आहे.

अनधिकृत बांधकामांमुळे गुन्हेगारी

अनधिकृत बांधकामाचे जाळे वसई-विरार शहरात पसरत चालले आहे. त्यामुळे गुन्हेगारी स्वरूपाच्या घटनांना खतपाणी मिळत आहे. धमक्या देणे, मारहाण करणे अशा घटना वाढत आहेत. अनधिकृत बांधकामातून येणारा पैसा आणि त्यातून डोळ्यावर येणारी धुंदी गुन्हेगारीला कारणीभूत असल्याचे येथील नागरिक सांगत आहेत.