सौरऊर्जा पाणीपंप घोटाळ्यातून शेतकऱ्यांची फसवणूक; विधानसभेत तारांकित प्रश्न

मुंबई : सौरऊर्जा पाणीपंप घोटाळ्यातून (Solar pump scam) शेतकऱ्यांना फसवण्यात आले आहे, त्यामुळे ही फसवणूक करणाऱ्यांवर कारवाई होणार का, असा मुद्दा भाजपचे (bjp) मुंबई अध्यक्ष मंगलप्रभात लोढा (Mangalprabhat lodha) यांनी सोमवारी विधानसभेत तारांकित प्रश्नाद्वारे उपस्थित केला. लोढा यांनी सौरऊर्जा पाणी पंप घोटाळ्यासंदर्भातील विषय लावून धरला. त्या वेळी लोढा म्हणाले की, महाविकास आघाडी सरकार (Maharashtra government) शेतकऱ्यांना नीट वीजपुरवठा करीत नाही. त्यातील पाणी पंपांचे कनेक्शनही सरकारकडून काढले जात आहे.

वीजनिर्मितीचे प्रमाण कमी असल्याचे कारण पुढे करत शेतकऱ्यांना सौरऊर्जेवर चालणारे पंप देण्यात आले. पण गेली दोन वर्षे ते पंप चालत नाहीत. याबाबत तक्रार करूनही काही निष्पन्न होत नाही, असेही त्यांनी दाखवून दिले. याआधी वनवासी भागातील एका महिलेकडून यासंदर्भात तक्रार करणारे पत्र मुख्यमंत्र्यांना लिहिले होते.

या प्रश्नावर उपाय करा किंवा मला आत्महत्या करण्याची परवानगी द्या, असेही त्या पत्रात लिहिले होते. मात्र मुख्यमंत्र्यांकडून त्याला काहीच उत्तर आले नाही किंवा याबाबत कोणताही निर्णय घेण्यात आला नाही, अशी खंत लोढा यांनी विधानसभेत व्यक्त केली. याविषयी समिती नेमून यासंदर्भातील अहवाल विधानसभेत सादर करण्यात यावा, अशी मागणी लोढा यांनी विधानसभेत केली.