White Onion: अलिबागच्या सफेद कांद्याला पर्यटकांची पसंती

Alibag News: रायगड जिल्ह्यात पर्यटनासाठी आलेले पर्यटक मोठ्या आवडीने अलिबागच्या सफेद कांद्याची माळ घेऊन जातात. औषधी गुणधर्म असलेल्या या सफेद कांद्याला नुकतेच विशेष आयएसओ मानांकन मिळाले आहे. त्‍यामुळे सफेद कांद्याची मागणीही वाढली आहे.

अलिबाग- मुरूडमध्ये येणारे पर्यटक परतीच्या प्रवासासाठी अलिबाग-वडखळ मार्गाने मुंबई, पुण्याकडे निघताना. या वेळी सफेद कांद्याची माळ, कलिंगड, आंबे, वालाच्या शेंगा, ताजी भाजी, औषधी कंदमुळे आवर्जून खरेदी करतात.

याशिवाय वेगवेगळ्या प्रकारचे घरगुती पापड, कुरुडया, दह्यातील मिरच्या, चिंच, वाल, इतर कडधान्याबरोबरच जवळा, बोबींल, वाकट्या, खाऱ्या, खारे बांगडे, विविध प्रकारची खारवलेली मासळी आदी बेगमीच्या वस्‍तू मोठ्या प्रमाणात खरेदी करतात.

ॠतुमानानुसार चिक्की, नारळीपाक, कोकम सरबत आदी खाद्यपदार्थांनाही ग्राहकांकडून मागणी वाढते. हे पदार्थ घेण्यासाठी मुख्य बाजारपेठेत जाण्यासाठी वेळ व पार्किंग समस्येमुळे अडचण येत असल्याने पर्यटक रस्त्याच्या दुतर्फा विक्रीस बसलेल्‍या आदिवासी महिला, कोळी महिला, स्‍थानिक नागरिकांकडून खरेदी करतात. त्‍यामुळे त्‍यांनाही रोजगार उपलब्‍ध होत आहे.

अलिबागला आल्यावर चिंचेच्या गोळ्यापासून कडधान्य, नाचणी, सुकी मासळी घेऊन जाता येते. त्यात सफेद कांदा विशेष आवडीचा झाला आहे. गतवर्षी १६० रुपये सफेद कांद्याची माळ होती, यंदा ती २०० रुपयांपर्यंत गेली आहे.

- ऊर्मिला रणदिवे, पर्यटक, गोरेगाव-मुंबई