Sudhagad: चौघा मच्छीमारांनी लावली जिवाची बाजी अन् पुरात अडकलेल्या दोघी जणींचे वाचवले प्राण, काय घडलं नेमकं ?

पाली, ता. १९ (वार्ताहर) ः सुधागड तालुक्यातील करचुंडे गावातील दोन महिला रविवारी (ता.१८) सायंकाळी सहाच्या सुमारास अंबा नदीचा प्रवाह वाढल्‍याने अडकल्‍या होत्‍या. याठिकाणी मासेमारी करणाऱ्या चार जणांनी या महिलांना जीवाची बाजी लावून नदीपात्रातून बाहेर काढले.

लता शरद पानसरे व श्वेता शेखर पानसरे या दोन महिला परळी येथील आपली दुकाने बंद करून अंबा नदीच्या पात्रातून करचुंडे येथे घरी निघाल्या होत्या. त्यांच्या सोबत मयुरी महेश वझरेकर व सार्थक शेखर पानसरे हे देखील होते. नदीचे पाणी कमी असल्याने हे चारही जण नदीतून पलीकडे जाण्यासाठी निघाले, मात्र अचानक नदीचे पाण्याचा प्रवाह वाढला. त्‍यामुळे मयुरी वझरेकर व सार्थक पानसरे हे दोघे पाठीमागे फिरून धावत नदीकिनारी पोहोचले. मात्र लता व श्वेता पानसरे या दोघींना पाठीमागे फिरून धावत किनारी जाता न आल्‍याने त्‍या नदीपात्रात अडकल्‍या.

पाण्याच्या जोरदार प्रवाहात त्‍या एकमेकींना धरून उभ्या होत्या. त्‍याच वेळी मासेमारी करत असलेले प्रमोद म्हस्कर, शिवा म्हस्कर, तुकाराम म्हस्क व रवींद्र म्हस्कर यांनी, टायर ट्यूबमध्ये बसून दोर लावून महिलांना जिवाची बाजी लावून सुखरूप नदीकिनारी आणले. नदीकिनारी असलेल्या लोकांनी दोर खेचून मदत केली. या मच्छीमारांचा परळी ग्रामस्थांनी रात्री सत्कार केला.