श्रीनगरमध्ये ग्रेनेड हल्ल्यात सहा नागरिक जखमी

श्रीनगरमध्ये ग्रेनेड हल्ल्यात सहा नागरिक जखमी
चकमकीत तीन दहशतवादी ठार; चार जवान जखमी

श्रीनगर, ता. ३ ः जम्मू-काश्‍मीरमध्ये दहशतवादी कारवाया पुन्हा एकदा सुरू झाल्या असून, रविवारी (ता. ३) दुपारी श्रीनगरमधील बाजारपेठेत गर्दीच्या ठिकाणी दहशतवाद्यांनी ग्रेनेड हल्ला केला. या हल्ल्यामध्ये सहा जण जखमी झाले आहेत. जखमींना जवळच्या रुग्णालयात दाखल करण्यात आले आहे.
हल्ला झाल्यानंतर संरक्षण दलाचे पथक घटनास्थळी पोहोचले आणि त्यांनी परिसरात जोरदार शोधमोहीम राबविली आहे. तसेच, संपूर्ण शहरातील सुरक्षा व्यवस्थाही वाढवली आहे. याबाबत वरिष्ठ पोलिस अधिकाऱ्यांनी माहिती दिली. दहशतवाद्यांनी येथील बाजारपेठेत मोठ्या गर्दीच्या ठिकाणी अचानकपणे हल्ला करून ग्रेनेड फेकले. ग्रेनेडच्या स्फोटानंतर परिसरात गोंधळ निर्माण होऊन नागरिक सैरावैरा धावू लागले, तर दुकाने पटापट बंद करण्यात आली. या हल्ल्यामध्ये प्राथमिक माहितीनुसार, सहा जण जखमी झाले आहेत. जखमींना तातडीने जवळच्या रुग्णालयात दाखल केले असून, त्यांच्यावर उपचार सुरू करण्यात आले आहेत. हल्ल्यानंतर सुरक्षा दलाने जोरदार शोधमोहीम राबविली असून, संपूर्ण परिसराला वेढा दिला आहे. तसेच, हल्ला नेमका कशा पद्धतीने केला, त्याची माहिती घेण्याचे काम सुरक्षा दलाकडून सुरू आहे.
...
चकमकीत तीन दहशतवादी ठार
श्रीनगर आणि अनंतनाग येथे शनिवारी दोन वेगवेगळ्या चकमकींमध्ये लष्कर-ए-तोयबाचा कमांडर आणि अन्य दोन दहशतवाद्यांना ठार करण्यात सुरक्षा दलाला यश आले आहे. श्रीनगर येथील चकमकीत उस्मान या कमांडरला ठार करण्यात आले. अनेक वर्षांपासून तो काश्‍मीर खोऱ्यात कारवाया करत होता. इन्स्पेक्टर मसरूर वानी यांच्या हत्येमध्ये त्याचा सहभाग होता. गेल्या वर्षी ऑक्टोबरमध्ये ईदगाह मैदानावर वानी क्रिकेट खेळत असताना त्यांची गोळ्या घालून हत्या करण्यात आली होती. या चकमकीमध्ये सुरक्षा दलाचे चार जवानही जखमी झाले आहेत. दोन केंद्रीय राखीव पोलिस दलाचे (सीआरपीएफ) जवान आणि दोन पोलिस जखमी झाले. आणखी एका दहशतवादविरोधी कारवाईमध्ये अनंतनाग जिल्ह्यात सुरक्षा दलांनी दोन अतिरेक्यांना ठार केले. शांगुस-लार्नू परिसरातील हलकन गलीजवळ ही चकमक झाली.