Mumbai Crime : भरदिवसा बॅंकेतून दागिने लंपास, महिलेसह तिच्या मुलाला अटक

Mumbai Crime - महाड शहरातील बँक ऑफ बडोदाच्या शाखेमधील कर्मचाऱ्यांच्या ड्रॉव्हरमध्ये ठेवलेले दोन लाख ८७ हजारांचे सोन्याचे दागिने चोरणाऱ्या बुरखाधारी महिलेसह तिच्या मुलाला अटक केली आहे. भरदिवसा बँकेत झालेल्या या प्रकाराने शहरात खळबळ उडाली होती.

महाड शहरातील प्रभात कॉलनीमध्ये बँक ऑफ इंडियाची शाखा आहे. या शाखेमधील कर्मचारी स्वरूप बालन (वय ३५) यांच्या ड्रॉव्हरमध्ये सोमनाथ शर्मा व मानसी गोठल यांनी बँकेत ठेवण्यासाठी दोन लाख ८७ हजार रुपयांचे दागिने दिले होते.

याचदरम्यान अडीच ते तीनच्या सुमारास बँकेत आलेल्या एका बुरखाधारी महिलेने हे दागिने घेऊन पोबारा केला आहे. शुक्रवारी (ता.३०) दुपारी हा प्रकार घडला असून याबाबत बँक कर्मचारी स्वरूप बालन यांनी महाड शहर पोलिस ठाण्यात तक्रार दाखल केली आहे. त्यानंतर पोलिसांनी सोन्याचे दागिने लंपास करणाऱ्या बुरखाधारी महिलेची ओळख पटवत प्रकरणात रफिका ढोकळे, साजिद ढोकळे, या मायलेकांना अटक केली आहे.