आयआरएम एनर्जी आयपीओ १७ ऑक्टोबरपासून खुला

मुंबई, ता. १२ : नैसर्गिक वायूचा पुरवठा करणारी कंपनी आयआरएम एनर्जीच्या आयपीओसाठी ४८० ते ५०५ रुपये किंमतपट्टा ठेवण्यात आला असून यात १७ ते २० ऑक्टोबरदरम्यान गुंतवणूक करता येईल. कंपनीचे अध्यक्ष महेश्वर साहू यांनी पत्रकारांना ही माहिती दिली.

या आयपीओमध्ये किमान २९ शेअरसाठी व त्यापुढे २९ शेअरच्या पटीत गुंतवणूक करावी लागेल. कर्मचाऱ्यांना ४८ रुपयांची सवलत मिळेल. हा इशू ५१८ ते ५४५ कोटी रुपयांचा असून यातील ३०७ कोटी रुपये तामिळनाडूमधील तिरुचिरापल्ली विभागातील वायू वितरण व्यवस्था सुधारण्यासाठी भांडवली खर्च म्हणून वापरला जाईल; तर १३५ कोटी रुपये कर्जफेडीसाठी वापरले जातील. बनासकाठा (गुजरात), फत्तेगड साहेब (पंजाब), दीव, गीर, सोमनाथ (गुजरात) तसेच तिरुचिरापल्ली (तामिळनाडू) येथे त्यांच्यातर्फे १४८ कंपन्यांना, २१९ व्यापारी आस्थापनांना, तसेच ५२,४५४ वैयक्तिक ग्राहकांना नैसर्गिक वायू पुरवठा केला जातो. त्यांचे एकूण सत्तर सीएनजी फिलिंग स्टेशन आहेत. जपानमधील मोठी नैसर्गिक वायू कंपनी शीजगॅस सोबत या कंपनीने सहकार्य करार केला आहे. कंपनीचा महसूल २०२१ मध्ये १८९ कोटी रुपये होता. तो यावर्षी ९८० कोटी रुपये झाला आहे. याच कालावधीत त्यांचा नफा ३४ कोटी रुपयांवरून ६३ कोटी रुपयांवर आला आहे.