Maharashtra News: राज्य सरकार २१ कोटींची खरेदी करणार सुतळी; जाणून घ्या कारण

Mumbai News: हिवाळी अधिवेशनात टीकेचा विषय राहिलेल्या सुतळी खरेदीवर अखेर राज्याच्या अन्न नागरी पुरवठा विभागाने शिक्कामोर्तब केले आहे. विभागाने २१ कोटी ६७ लाख रुपयांच्या सुतळी खरेदीस मान्यता दिली आहे. यात पुन्हा १० कोटींच्या वाढीव खरेदीस मान्यता देण्यात आली आहे. (eknath shiden)

अन्न नागरी पुरवठा व ग्राहक संरक्षक विभागाच्या सुतळी खरेदीवर हिवाळी अधिवेशनात जोरदार चर्चा झाली होती. विभागाकडून ७२ रुपये किलोंची सुतळी ४२० रुपयांनी खरेदी होत असल्याचा आरोप विरोधी पक्षांचे आमदार जयंत पाटील, यशोमती ठाकूर, बाळासाहेब थोरात यांनी केला होता. मंत्री छगन भुजबळ आणि विरोधी सदस्यांमध्ये यावरून जोरदार खडाजंगी झाली होती. यावेळी मंत्री भुजबळ यांनी अशा गोष्टी होत नसल्याचे सांगितले होते. (chaggan bhujbal news)

विरोधकांनी केलेल्या आरोपानंतरही गुरुवारी (ता.७) अन्न नागरी पुरवठा विभागाने सुतळीगाठी खरेदीच्या प्रस्तावास मान्यता दिली आहे. राज्यातील शासकीय धान्य गोदामांमध्ये पोती शिवण्यासाठी वीज उपलब्ध असते. मात्र, लोडशेडिंग व अन्य कारणांमुळे वीजपुरवठा खंडित होतो. काहीवेळा पोती शिवणयंत्र नादुरुस्त झाल्यास शासकीय धान्य गोदामांमधील पोती शिवण्यासाठी सुतळी खरेदीस मान्यता दिली असल्याचे म्हटले आहे.

वर्षभराच्या कालावधीसाठी साधारण ५ लाख २८ हजार ६४७ किलोची सुतळी लागणार आहे. ही सुतळी खरेदी ४१० रुपये किलो दराने खरेदी करण्यात येणार आहे. यासाठी येणाऱ्या २१ कोटी ६७ लाख ४५ हजार २७० रुपयांच्या खर्चास विभागीय भांडार खरेदी समितीने मान्यता दिली होती . यात पुन्हा १० कोटींच्या वाढीव सुतळी खरेदीस मान्यता दिली आहे.