Mumbai News: ठाकरे गट आणि ‘वंचित’चा प्रचाराचा धडाका; महायुतीत संभ्रमाचे वातावरण

Mumbai News: मुंबईतील उत्तर पश्चिम (वायव्य) लोकसभा निवडणुकीसाठी महाविकास आघाडीच्या शिवसेना ठाकरे गटाने आणि दुसरीकडे ‘वंचित’ने आपले उमेदवार जाहीर करून प्रचार सुरू केला आहे, मात्र याठिकाणी महायुतीला अजूनही आपला उमेदवार निश्चित करता न आल्याने कार्यकर्त्यांमध्ये संभ्रमाचे वातावरण निर्माण झाले आहे.

याच पार्श्वभूमीवर ठाकरे गटाचे उमदेवार अमोल कीर्तिकर आणि ‘वंचित’चे उमेदवार ॲड. संजीवकुमार कलकोरी यांनी प्रचारांचा जोर वाढवला आहे. या दोघांनी मतदारांच्या घरांपर्यंत जाऊन प्रचार सुरू केला असल्याने भाजप, शिवसेना (शिंदे गट) आणि राष्ट्रवादी (अजित पवार गट) महायुतीचे कार्यकर्ते उमेदवारच जाहीर नसल्याने प्रचार कोणाचा करायचा, अशा संभ्रमात सापडले आहेत.

उत्तर पश्चिम लोकसभा मतदारसंघाची जागा सुरुवातीला भाजपच्या माध्यमातून लढली जाणार होती, मात्र त्यानंतर ठाकरे गटाने गजानन कीर्तिकर यांना उमेदवारी दिल्याने या जागेवर शिंदे गटाने आपला दावा केला.

या मतदारसंघात सुरुवातीला भाजपचे अमित साटम, त्यानंतर काँग्रेसमधून बाहेर पडलेले संजय निरूपम यांचेही नाव चर्चेत आले होते. आता मात्र शिंदे गटाकडून रवींद्र वायकर यांना उभे केले जाणार असून त्यासाठीची तयारीही सुरू झाली असल्याचे सांगण्यात येते. मात्र, या मतदारसंघात प्रामुख्याने चार विधानसभा क्षेत्रात भाजपचे आमदार असून केवळ दिंडोशी आणि अंधेरी पूर्वमध्ये ठाकरे गटाचे आमदार आहेत.

तरीही यादरम्यान प्रचारासाठी ठाकरे गटाचे प्रतिनिधी प्रत्येक मतदारांच्या दारापर्यंत पोहोचत असून अशीच रणनीती वंचितचे उमेदवार ॲड. संजीवकुमार कलकोरी यांनीही आखली असल्याने महायुतीच्या पदाधिकारी, कार्यकर्त्यांमध्ये नेमका प्रचार कोणाच्या नावावर करायचा, असा संभ्रम निर्माण झाला असल्याचे सांगण्यात येते.