Mumbai: मॅनहोलमध्ये पडून कामगाराचा मृत्यू; बोरिवलीमध्ये दुर्दैवी घटना, जबाबदार कोण ?

मुंबई, ता. ८ : बोरिवली पश्चिम येथे मॅनहोलमध्ये पडून एका कामगाराचा मृत्यू झाला आहे. गुरुवारी सायंकाळी ४:३० च्या सुमारास ही घटना घडली.

गोखले शाळेसमोर सिंपोली रोडवर खासगी कंत्राटदाराने साफसफाईसाठी मॅनहोल उघडला होता. हे काम सुरू असताना सुनील वाकोडे (वय-३५) हा मॅनहोलमध्ये पडल्याची माहिती पालिकेचे अधिकारी पटेल (एसई) यांनी दिली. दुर्घटनेची माहिती मिळताच मुंबई अग्निशमन दल आणि विभाग कर्मचारी घटनास्थळी पोहोचले. जखमी व्यक्तीला तातडीने बीडीबीए रुग्णालयात दाखल केले; मात्र डॉक्टरांनी त्याला मृत घोषित केले.