कार्यकर्त्यांच्या पोटपुजेसाठी कॅटरसवाले पहाटेपासून कामाला

कार्यकर्त्यांच्या पोटपूजेसाठी केटरर्सवाले पहाटेपासून कामाला
- नाश्त्याला पोहे, उपमा, वडापाव, तर दुपारी खमंग बिर्याणीवर ताव
सकाळ वृत्तसेवा
मुंबई, ता. २० : मतदानाच्या दिवशी वेगवेगळ्या राजकीय पक्षांच्या बूथवर बसलेल्या कार्यकर्त्यांची पोटपूजा चांगली व्हावी. चहा, पाणी, नाश्ता, जेवण वेळेवर मिळावे, यासाठी सर्वच उमेदवारांना कॅटरसवाल्यांना मोठमोठ्या ऑर्डर दिल्या होत्या. त्यानुसार पोहे, उपमा, वडापाव, दुपारसाठी बिर्याणी बनवण्यासाठी केटरर्सवाले पहाटेपासूनच कामाला लागले होते.
सकाळी सात वाजल्यापासून कार्यकर्ते मतदान केंद्रावर पोलिंग एजंट म्हणून कार्यरत असतात, तसेच जास्तीत जास्त मतदारांना मतदान केंद्रावर आणण्यामध्ये मोठी भूमिका बजावतात. त्यामुळे उमेदवारांकडून त्यांची चांगलीच खातीरदारी केली जाते. सकाळी नाश्त्याला पोहे, उपमा, वडापाव, तर दुपारी खमंग बिर्याणी उपलब्ध करून दिली.

१००० ते १२०० रुपये प्रतिकिलो बिर्याणीचा भाव
मतदान केंद्रावरील अधिकारी-कर्मचाऱ्यांसाठी निवडणूक आयोगाने वेगवेगळ्या ठिकाणाहून जेवणाच्या ऑर्डर दिल्या, तसेच उमेदवारांनीही चिकन बिर्याणीच्या मोठ्या ऑर्डर दिल्या होत्या. त्यामुळे सहाशे-आठशे रुपये किलो भावाने मिळणाऱ्या बिर्याणीचा भाव आज १००० ते १२०० रुपये एवढा असल्याचे बिस्मिल्ला कॅटरर्सचे मालक अस्लम दुराणी यांनी सांगितले.