पेट्रोल पम्पावर राडा घालणारे ताब्यात

सकाळ वृत्तसेवा
डोंबिवली, ता. १५ ः पेट्रोल पम्पावर पेट्रोल भरण्याच्या वादातून धक्काबुक्की झाल्याचा आणि बाचाबाची झाल्याचा प्रकार डोंबिवलीत घडला. बैल बाजार येथील हिंद ऑटोमोबाईल पेट्रोल पम्पावर ही घटना घडली. याप्रकरणी पेट्रोल पम्पाचे मालक शैलेश काकराणी यांच्या तक्रारीवरून मुकलीस फक्की (वय ३०) आणि जावेद डॉन (वय ३७) यांच्यावर गुन्हा दाखल करण्यात आला आहे.

शुक्रवारी दुपारच्या सुमारास मुकलीस आणि जावेद हे दोघे पेट्रोल भरण्यासाठी आले होते. या वेळी रांगेतून न येता त्यांनी पोट्रोल भरण्यास सांगितले. तेव्हा पम्पावरील कर्मचाऱ्यांनी त्यांना रांगेत येण्यास सांगितले; पण मुकलीस आणि जावेद यांनी सौरभ या कर्मचाऱ्याला धक्काबुक्की केली. त्यानंतर पेट्रोल भरण्याचे नोझेल हातात घेऊन त्यांनी पेट्रोल भरण्याचा प्रयत्न केला. कर्मचाऱ्यांनी त्यांना थांबवण्याचा प्रयत्न केला; पण या झटापटीत नोझलचा चाप दाबला गेल्याने पेट्रोल बाहेर उडाले. तेव्हा कर्मचाऱ्यांनी एकत्र येत दोघांनाही रोखण्याचा प्रयत्न केला. तेव्हा शिवीगाळ करत दोघांनी तिथून काढता पाय घेतल्याचे तक्रारीत सांगण्यात आले. पोलिसांनी या दोघांनाही ताब्यात घेतले आहे.