वाईन शॉप फोडणाऱ्या सराईत चोरट्यांना अटक

सकाळ वृत्तसेवा

डोंबिवली, ता. १६ : डिलक्स वाईन शॉपचे शटर व आतील लोखंडी ग्रील उचकटून चोरट्यांनी गल्ल्यातील आठ लाखांची रोकड लंपास केल्याची घटना डोंबिवलीत घडली होती. याप्रकरणी रामनगर पोलिसांनी सीसी टीव्ही फुटेजच्या आधारे चोरट्यांचा शोध घेत तिघांना अटक केली आहे. सरुउददीन शेख (वय ३२), जुबेर जलील अन्सारी (वय २६) आणि शहाबुददीन ताजउददीन शेख (वय ३२) अशी अटक केलेल्या आरोपींची नावे आहेत. पोलिसांनी आरोपींकडून तीन लाख ५० हजारांची रक्कम हस्तगत केली आहे. कल्याण जिल्हा सत्र न्यायालयाने आरोपींना चार दिवसांची पोलिस कोठडी सुनावली आहे. कल्याण पश्चिमेला राहणारे रवींद्र शेट्टी यांचे डोंबिवलीमध्ये डिलक्स वाईन शॉप मार्ट आहे. रविवारी रात्री दुकान बंद केले असता चोरट्यांनी रात्री १०.३० ते पहाटे ३ च्या दरम्यान दुकानाचे शटर उचकटून व आतील लोखंडी ग्रील कापून दुकानात प्रवेश केला. त्यानंतर दुकानातील आठ लाख रुपयांची रोकड चोरट्यानी लंपास केली होती. शेट्टी यांच्या तक्रारीनुसार रामनगर पोलिस ठाण्यात गुन्हा दाखल करण्यात आला. गुन्हे प्रकटीकरण शाखेचे सहायक पोलिस निरीक्षक बळवंत भराडे, सहायक पोलिस निरीक्षक बळवंत भराडे, योगेश सानप, पोलिस हवालदार विशाल वाघ, भणगे, शिवाजी राठोड, नितीन सांगळे यांच्या पथकाने तपास केला.