वाड्यातील कंपनी बंद करण्याचे आदेश

वाडा, ता. २२ (बातमीदार) : तालुक्यातील आंबिस्ते येथील ग्रामस्थ वाडा तहसील कार्यालयासमोर कंपनीविरोधात गुरुवारी (ता. २०) उपोषणाला बसले होते. या आंदोलनाची दखल आमदार संजय केळकर यांनी घेत विधानसभेत हा विषय उपस्थित केला होता. या प्रकरणाची महाराष्ट्र प्रदूषण नियंत्रण मंडळाने दखल घेत जी. के. फाउंडर्स कंपनीवर कारवाई करत नोटिशीद्वारे कंपनी बंद करण्याचे आदेश दिले आहेत. त्यामुळे ग्रामस्थांनी आंदोलन मागे घेतले.

वाडा तहसील कार्यालयासमोर आंबिस्ते ग्रामस्थांचे उपोषण सुरू झाल्यावर भाजप पालघर जिल्हाध्यक्ष नंदकुमार पाटील यांनी हा विषय आमदार संजय केळकर यांच्या दूरध्वनीवरून कानावर घातला होता. केळकर यांनी हा विषय अधिवेशनात उपस्थित करून ग्रामस्थांना न्याय मिळवून दिला. तालुक्यातील आंबिस्ते गावामध्ये जे. के. फाउंडर्स कंपनीत अॅल्युमिनियमवर प्रक्रिया करून विविध वस्तू बनवल्या जातात. त्यातून होणारे प्रदूषण हे खूप घातक असल्याने शेत पीक, फळझाडे आणि नागरिकांच्या आरोग्यावर त्याचा विपरीत परिणाम होतो. या कंपनीविरोधात दहा वर्षे संघर्षाची लढाई सुरू असून अखेर महाराष्ट्र प्रदूषण नियंत्रण मंडळाने दखल घेत कंपनी बंद करण्याचे आदेश दिले आहेत.