मरिन ड्राईव्ह भुयारी मार्गाच्या निविदेत स्पर्धा

सकाळ वृत्तसेवा

मुंबई, ता. २२ : मुंबईतील नागरी बांधकाम योजनेंतर्गत ऑरेंज गेट ते मरिन ड्राईव्ह या भुयारी रस्त्यासाठी ‘एल अँड टी’ने सर्वात कमी बोली लावली आहे. ऑरेंज गेट ते मरिन ड्राइव्ह हे अंतर कमी वेळेत पार करता यावे, यासाठी एमएमआरडीएच्या माध्यमातून भुयारी मार्ग बांधण्यात येणार आहे. ३.८ किलोमीटर लांबीच्या या प्रकल्पात दुहेरी बोगदे असतील.

पूर्व द्रुतगती मार्गावरून कोस्टल रोडला जोडण्यासाठी आणि जलद वाहतुकीसाठी एमएमआरडीएने हा भुयारी मार्ग प्रकल्प हाती घेतला आहे. हा प्रत्येक बोगदा ३.२ मीटर रुंदीचा असेल. या मार्गाचा वेग ८० किलोमीटर प्रतितास असेल. प्रकल्प आराखड्यानुसार, रस्त्याची मार्गरेषा पूर्व मुक्त मार्गाच्या ऑरेंज गेटपासून चिंचबंदर रेल्वे ओलांडणी पुलाच्या पूर्वेकडून सुरू होते. तेथून सरदार वल्लभभाई पटेल या रस्त्यावरून हार्बर व मध्य रेल्वेमार्ग, मोहम्मद अली रस्ता, पठ्ठे बापूराव मार्ग (अलंकार सिनेमा चौक), राजा राममोहन रॉय मार्ग (हरकिसन नरोत्तमदास हॉस्पिटल), तसेच विठ्ठलभाई पटेल रस्ता, लॅमिंग्टन रोड, न्यू क्वीन रस्ता, पश्चिम रेल्वेवरील वरेकर रेल्वे पूल आदी रस्ते ओलांडून नेताजी सुभाषचंद्र बोस मार्ग (मरिन ड्राईव्ह) येथे सागरी किनारा मार्गाच्या दरम्यान प्रस्तावित आहे.

एमएमआरडीएला या प्रकल्पासाठी अंदाजे ६,५०० कोटी रुपये खर्च अपेक्षित आहे. २० जुलै रोजी या प्रकल्पासाठी आर्थिक निविदा उघडण्यात आल्या. यामध्ये एल अँड टी आणि जे. कुमार इन्फ्राप्रोजेक्ट्स यांचा निविदेत समावेश आहे. त्यांनी अनुक्रमे ७,७६५ कोटी आणि ८,५८९ कोटी रुपये इतकी बोली लावली आहे.