अन्न औषध प्रशासनाची सीबीडीतील हॉटेलवर कारवाई

नवी मुंबई, ता. २३ (वार्ताहर) : सीबीडी बेलापूर, सेक्टर- १५ मधील शिवराज ढाबा येथे आरोग्याच्या दृष्टिकोनातून अत्यंत महत्त्वाच्या तरतुदींचे पालन केले जात नसल्याचे अन्न व औषध प्रशासन विभागाने केलेल्या तपासणीत आढळून आले आहे. त्यामुळे अन्न व औषध प्रशासनाने हा ढाबा तत्काळ बंद करण्याचे आदेश दिले आहेत. त्यानुसार हा ढाबा आता बंद करण्यात आला आहे.
राज्याचे अन्न व औषध प्रशासन राज्यमंत्री धर्मराव बाबा आत्राम आणि प्रशासन आयुक्त अभिमन्यू काळे यांच्या निर्देशानुसार संपूर्ण राज्यात हॉटेल तपासणी मोहीम राबवली जात आहे. त्यानुसार सोमवारी (ता. २१) ठाण्यातील अन्न औषध प्रशासनाच्या वतीने सीबीडी बेलापूर, सेक्टर- १५ मधील शिवराज ढाब्याची तपासणी करण्यात आली. या तपासणीत येथे तयार होणाऱ्या अन्नपदार्थांवर लक्ष ठेवण्यासाठी विहित शैक्षणिक पात्रताधारक पर्यवेक्षकांची नेमणूक करण्यात आली नसल्याचे आढळून आले. तसेच अन्नपदार्थ विक्रीसाठी तयार करताना वापरल्या जाणाऱ्या पाण्याची तपासणी करण्यात येत नसल्याचे तसेच अन्नपदार्थ बनवताना त्यासाठी लागणाऱ्या कच्च्या अन्नपदार्थांची हाताळणी करणाऱ्या कामगारांची आरोग्य तपासणीही करण्यात आली नसल्याचे आढळून आले आहे. यामुळे हा ढाबा बंद करण्याचे आदेश प्रशासनाने दिले. ही कारवाई अन्न व औषध प्रशासन आयुक्त अभिमन्यू काळे यांच्या निर्देशानुसार कोकण विभागाचे सहआयुक्त सुरेश देशमुख, सहायक आयुक्त योगेश ढाणे यांच्या मार्गदर्शनाखाली अन्न सुरक्षा अधिकारी रश्मी वंजारी यांनी केली. कोणत्याही अन्नपदार्थाच्या गुणवता व दर्जाबाबत किंवा अन्न आस्थापनेबाबत कोणतीही तक्रार असल्यास त्याबाबत १८००-२२२-३६५ या माहिती प्रशासनाच्या टोल फ्री क्रमांकावर नोंदवावी, असे आवाहन अन्न व औषध प्रशासन विभागाकडून करण्यात आले आहे.