बेपत्ता बालिकेचा मृतदेह प्लास्टिक ड्रममध्ये

भिवंडी, ता. १५ (बातमीदार) : तीन दिवसांपासून बेपत्ता असणाऱ्या सहा वर्षांच्या मुलीचा मृतदेह शुक्रवारी (ता. १५) एका बंद खोलीतील प्लास्टिकच्या ड्रममध्ये आढळून आल्याने खळबळ उडाली आहे. मुलीच्या मानेवर गळा दाबल्याच्या खुणा आढळल्या असून पोलिसांनी मारेकऱ्याविरुद्ध खुनाचा गुन्हा दाखल करून आरोपीचा शोध सुरू केला आहे.
फेणेगाव येथील बाबा शाळेजवळ पालकांबरोबर राहणारी सहा वर्षांची मुलगी बुधवारी (ता. १३) दुपारी १२ वाजता घराजवळ खेळत असताना अचानक बेपत्ता झाली होती़. याबाबत अपहरणाचा गुन्हा दाखल करण्यात आला होता. अपहृत मुलीचा पोलिस शोध घेत असताना शुक्रवारी दुपारी त्याच परिसरात एका बंद खोलीतून उग्र वास येत असल्याची माहिती पोलिसांना मिळाली. पोलिसांनी बंद खोलीचे कुलूप तोडून घरात प्रवेश करून शोध घेत असताना खोलीत ठेवलेल्या प्लास्टिकच्या छोट्या ड्रममध्ये बेपत्ता मुलीचा मृतदेह आढळून आला. मृत मुलीच्या मानेवर आढळलेल्या खुणांवरून मुलीचा गळा आवळून खून करण्यात आल्याचे स्पष्ट झाले असल्याची माहिती भिवंडी शहर पोलिस ठाण्याचे वरिष्ठ पोलिस निरीक्षक चेतन काकडे यांनी दिली.

-------------
शवविच्छेदन अहवालानंतर तपासाला गती
हत्येपूर्वी मुलीसोबत घडलेल्या घटनेची माहिती मिळू शकली नाही. त्यामुळे मुलीचा मृतदेह शवविच्छेदनासाठी मुंबईतील जे. जे. रुग्णालयात पाठवण्यात आला आहे. शहर पोलिस ठाण्याच्या पोलिसांनी आरोपीविरुद्ध खुनाचा गुन्हा दाखल करून तपास सुरू केला आहे. मृत मुलीचे वडील यंत्रमाग चालवतात; तर आई गोदामात कामाला होती. घरात असलेल्या बालिकेच्या एकटेपणाचा फायदा घेत तिची हत्या करण्यात आली आहे. या घटनेनंतर परिसरात प्रचंड संताप व्यक्त केला जात आहे.