अंधेरीत बारा ज्योतिर्लिंग पाहण्यासाठी नागरिकांची गर्दी

अंधेरीत बारा ज्योतिर्लिंग पाहण्यासाठी नागरिकांची गर्दी
प्रभादेवी, ता. २७ (बातमीदार) ः गणेश भक्तांसह नागरिकांना बारा ज्योतिर्लिंगाचे दर्शन घडावे, यासाठी अंधेरी कामगार नगर येथील अंधेरीचा सम्राट म्हणून प्रसिद्ध असलेल्या मंडळाने यंदा बारा ज्योतिर्लिंग असलेला देखावा साकारला आहे. हा देखावा पाहण्यासाठी नागरिकांची गर्दी होत आहे.
अंधेरी पश्चिम कामगार नगर येथील कामगार नगर आणि सार्वजनिक गणेशोत्सव मंडळातील तरुणांनी आठ दिवस अहोरात्र मेहनत घेऊन स्वखर्चातून हा देखावा उभारला आहे. श्री केदारनाथ, मल्लिकार्जुन, रामेश्वर, वैद्यनाथ, भीमाशंकर, नागेश्वर, त्र्यंबकेश्वर, ओंकारेश्वर अशी बारा ज्योतिर्लिंग या देखाव्यातून दाखविण्यात आली आहेत. त्यामुळे या ज्योतिर्लिंगाचे दर्शन घेण्यासाठी परिसरातून गर्दी होत आहे. मंडपाच्या आतमध्ये प्रवेश केल्यानंतर ज्योतिर्लिंग त्यानंतर हातात कमंडलू आणि त्रिशूळ घेऊन उभी असलेली भव्य शिवरूपी गणेशाची मूर्ती पाहून मन प्रसन्न होते. अंधेरी उपनगरातील हे सर्वात जुने मंडळ असून यापूर्वीही त्यांनी राम अवतार, गुंफा यांसारखे ऐतिहासिक व विविध प्रकारचे देखावे साकारले आहेत.
..............................................

दरवर्षी गणेशोत्सवात काही तरी वेगळे करण्याचा मंडळाचा नेहमीच प्रयत्न असतो. देखावा पाहण्यासाठी दहा दिवसांत राजकीय नेते, सेलिब्रिटी, सामाजिक कार्यकर्ते तसेच परिसरातल्या रहिवाशांसह बाहेरून नागरिकांची गर्दी होत असते.
- सुशील राजेसावंत, पदाधिकारी, कामगार नगर आणि परिसर सार्वजनिक गणेशोत्‍सव मंडळ