एशियन पेंटचे सहसंस्थापक अश्विन दाणी यांचे निधन

मुंबई, ता. २९ : एशियन पेंटचे सहसंस्थापक आणि बिगर कार्यकारी संचालक अश्विन दाणी (वय ८१) यांचे गुरुवारी अल्प आजाराने निधन झाले. दाणी हे १९६८ पासून कंपनीशी संबंधित होते. कंपनीच्या नवकल्पना आणि प्रशासन यात त्यांचा सिंहाचा वाटा होता. ते १९९८ ते २००९ या कालावधीत एशियन पेंटचे कंपनीच उपाध्यक्ष आणि एमडी होते. २०१८ पासून संचालक मंडळाचे अध्यक्षही होते. कंपनीची वाढ होण्यात त्यांची महत्त्वाची भूमिका होती. या क्षेत्रात अनेक नवीन कल्पनांना त्यांनी जन्म दिला. आपल्याला हवा असलेला रंग संगणकावर आपल्या भिंतीच्या सध्याच्या रंगांशी जुळवण्याचे तंत्र हे त्यांनीच सर्वप्रथम अमलात आणले व नंतर ते अनेक क्षेत्रात आणि वेगवेगळ्या ठिकाणी वापरण्यात आले.