टीबीची औषधे उपलब्ध करा!

सकाळ वृत्तसेवा
मुंबई, ता. २ : एकीकडे आरोग्य आणि कुटुंब कल्याण मंत्रालय टीबीची औषधे उपलब्ध असल्याचा दावा करत आहे; तर दुसरीकडे मुंबईतील अनेक ड्रग रेझिस्टंट टीबीच्या रुग्णांना अद्यापही डॉट केंद्रांवर सायक्लोसरीन औषध मिळत नाही. सरकारने औषधे कागदावर न देता डॉट केंद्रांवर उपलब्ध करून दिली तर बरे होईल, असे क्षयरोग रुग्ण व कार्यकर्त्यांचे म्हणणे आहे.
मुंबईत जूनपासून ड्रग रेझिस्टंट टीबी रुग्णांच्या औषधांचा तुटवडा आहे. यासंदर्भात कार्यकर्त्यांनी आवाज उठवला आहे. देशात आणि परदेशातील क्षयरुग्णांच्या कल्याणासाठी काम करणाऱ्या एकूण ११३ स्वयंसेवी संस्थांनी औषधांचा तुटवडा दूर करण्यासाठी पंतप्रधान नरेंद्र मोदी यांना पत्रही लिहिले आहे. टीबी रुग्णांसाठी काम करणारे कार्यकर्ते गणेश आचार्य म्हणाले, की सरकार कागदावर औषधे उपलब्ध असल्याचे सांगत आहे; परंतु प्रत्यक्षात सायक्लोसरीन औषध अद्याप उपलब्ध नाही. सरकार त्रस्त असलेल्या रुग्णांची चेष्टा करत आहे.